პრემიერმინისტრმა გიორგი კვირიკაშვილმა დღეს, თბილისში, მასწავლებელთან გამართა შეხვედრა და მათთან განათლების რეოფრმის მნიშვნელობაზე ისაუბრა.

კვირიკაშვილის თქმით, 2017 წლიდან მასწავლებელთა საშუალო ხელფასი ხდება 800 ლარი, ამ მიმართულებით სვლა გაგრძელდება. პრემიერის შეფასებით, ცენტრალური ფიგურა უნდა გახდეს მოსწავლე, სტუდენტი და მკვლევარი და მასზე უნდა იყოს ორიენტირებული მთელი სისტემა, სამინისტრო და მთავრობა.

მასწავლებლებთან შეხვედრაზე წარმოთქმულ სიტყვას მთავრობის პრესსამსახური ავრცელებს. მთავრობის მეთაურის თქმით, მას არ უნდა, რომ სიტყვა რეფორმა სადამჯელო სიტყვად იქცეს: "გვინდა, ეს სიტყვა დადებით ცვლილებებთან იყოს ასოცირებული, რომლებიც უპირველეს ყოვლისა, თქვენგან იქნება მოწონებული, ყველა თქვენგანთან შეთანხმებული, თქვენი აზრის გათვალისწინებით და თქვენი ჩართულობით გაკეთებული რეფორმა გვინდა ჩვენ; არ გვსურს, თავს მოგახვიოთ ჩვენი აზრები, რომელიც არ იქნება თანხვედრაში თქვენს გამოცდილებასთან; თქვენი გამოცდილება უნდა იყოს ამოსავალი ნებისმიერი ნაბიჯისა, რომელსაც გადავდგამთ მომავალში. ამას ემსახურება დღევანდელი შეხვედრაც, რომ მოვისმინოთ და გავითვალისწინოთ თქვენი მოსაზრებები ჩვენს მომავალ საქმიანობაში".

გიორგი კვირიკაშვილმა პედაგოგებთან შეხვედრისას იმ საქმეებზეც ისაუბრა, რაც ქართული ოცნების მთავრობამ ბოლო წლებში განახორციელა, მათ შორისაა სკოლებში ფსიქოლოგის სამსახურის დანერგვა, სოფლის სკოლების უზრუნველყოფა სასკოლო ავტობუსებით, ექიმის მომსახურების აღდგენა და ა.შ.

პრემიერის განცხადებით, განათლების მინისტრს აქვს კარგი იდეები სისტემაში ახალი ტექნოლოგიების შემოტანასთან დაკავშირებით, რაც პედაგოგების საქმიანობის გამარტივებას შეუწყობს ხელს. მათ შორის, თავისუფალი გაკვეთილის ცნების შემოღებაც იგეგმება:

"ეს ყველაფერი იქნება მხოლოდ იმისთვის, რომ თქვენ გაგიადვილოთ საქმიანობა, რომ სასწავლო პროცესი გახადოთ უფრო საინტერესო, მიმზიდველი და მოსწავლეებისთვის, სკოლა გახდეს ადგილი, სადაც ეხალისებათ მისვლა, სადაც არა მხოლოდ განათლებას მიიღებენ, არამედ ადამიანური საუბარი ექნებათ თავიანთ პედაგოგებთან ყველაფერზე, რაც მათ აწუხებთ, რაც ძალიან მნიშვნელოვანია. ამისთვის, თავისუფალი გაკვეთილების ინსტიტუტის დანერგვა იგეგმება, რათა თემების ფართო სპექტრი იყოს განხილული ბავშვებსა და პედაგოგებს შორის. ყველა ამ ნაბიჯის შედეგად ჩვენ უნდა მივიღოთ განათლების ხარისხის აწევა, ასევე, მივეხმაროთ პედაგოგებს გადამზადებაში; ჩვენ არ უნდა გავხადოთ გამოცდები და ტესტირებები სადამსჯელო მექანიზმი პედაგოგებისთვის, პირიქით, პედაგოგს უნდა ჰქონდეს წინასწარი პროცედურა გავლილი, რომ შემდეგ მას ეხალისებოდეს ამაღლებული კვალიფიკაციის დადასტურება და არა ის, რომ შიშით ელოდებოდეს ამას. დარწმუნებული ვარ, ჩვენ ამას მივაღწევთ. მასწავლებლის პროფესია, როგორც ერთ-ერთი ცენტრალური, სტრატეგიული და ქვეყნის მომავლის განმსაზღვრელი ადამიანის პროფესია, უნდა გავხადოთ ყველაზე საამაყო და პრესტიჟული. ეს არის ჩვენი მიზანი და დარწმუნებული ვართ, ამას მივაღწევთ".

მთავრობის მეთაურმა 500–ზე მეტ მასწავლებელთან შეხვედრისას მათ ღვაწლზეც ისაუბრა, განსაკუთრებით იმ წლებში, როცა ქვეყანაში საყოველთაო გაჭირვება იყო, განათლებაში კი, მასწავლებელთა დამსახურებით, წყვეტა არ ყოფილა. კვირიკაშვილმა მასწავლებლებს სამომავლოდ მათი შრომის შესაბამისად დაფასების პირობაც მისცა.