გადასახადების გადახდა, ვარჯიში, სახლის დალაგება, მუშაობა — ეს საქმეების მცირე, მაგრამ ძირითადი ჩამონათვალია, რომელთა შესრულებაც ყოველდღიურად, თითოეულ ჩვენგანს უწევს.

მეტიც, ყოველდღიური საქმეები ხშირად გადაიქცევა ხოლმე მტანჯველ რუტინად და საბოლოო ჯამში მივდივართ იმ საშინელ განცდამდე, რომ საქმის საკეთებლად არც დრო, არც ენერგია და აღარც ნერვები გვყოფნის.

სინამდვილეში ყველაფერი გაცილებით მარტივად არის, ან შეიძლება რომ იყოს, რადგან არსებობს მარტივი ხერხები, რომელთა გააზრებით/გათვალისწინებით, ჩვენი ყოველდღიურობა გაცილებით უკეთესი გახდება. ვიქნებით უფრო რეალიზებული და ბედნიერი თავად ჩვენც.

აი, 10 რჩევა იმის გასაკეთებლად, რისი გაკეთებაც ხშირად ძალიან არ გვსიამოვნებს:

1. შეცვალეთ სამუშაო გარემო

მოგბეზრდათ ერთსა და იმავე ოთახში ჯდომა და საშინაო დავალების კეთება?! მაშინ აუცილებლად შეცვალეთ სამუშაო გარემო. იმუშავეთ რომელიმე პარკში, სადაც სუფთა ჰაერია, ან წადით კაფეში და იქაური სიმყუდროვით დატკბით.

2. საქმეზე კონცენტრირდით

ნებისმიერი დავალების, თუ მნიშვნელოვანი საქმის შესასრულებლად, აუცილებელია, რომ მასზე სრულად კონცენტრირდეთ. სრულიად იზოლირდით გარემო ფაქტორებისგან, რათა ზედმეტმა ხმაურმა თქვენი ყურადღება სხვა რამეზე არ გადაიტანოს. თუ ოფისში ხართ და თანამშრომლების საუბარი ხელს გიშლით, გამოიყენეთ ყურსასმენი ან ყურის საცობები.

3. სცადეთ ჯგუფურად მუშაობა

დიდი შანსია, რომ მნიშვნელოვანი პროექტის მოსამზადებლად ერთი ადამიანის გონებრივი რესურსი საკმარისი არ აღმოჩნდეს. ასეთ შემთხვევაში კარგი იქნება, თუ სხვა ადამიანების დახმარებაზე უარს არ იტყვით და ჯგუფურად მუშაობას ცდით.

4. დალიეთ ყავა

თუ ბევრი საქმე გაქვთ და დრო არ გყოფნით, რომ კარგად გამოიძინოთ, ენერგიის სხვა წყარო ეძებეთ. მაგალითად ყავა, რომელიც გამოფხიზლებაში დაგეხმარებათ. ჩაი სასიამოვნო შეგრძნებებს გაგიღვიძებთ, ნოყიერი საჭმელი კი იმის გარანტია იქნება, რომ დამღლელი სამუშაო დღის შემდეგ, სახლამდე მისვლის ენერგიაც დაგრჩებათ.

5. ყურადღებით დააკვირდით პროცესს/დეტალებს

თუ წონის დაკლება გინდათ, მაგრამ ნებისყოფა არ გყოფნით, სცადეთ, რომ თავად პროცესზე კონცენტრირდეთ. მაგალითად, სირბილის დროს დააკვირდით, თუ როგორ მოძრაობს თქვენი სხეული და როგორი სასიამოვნოა, როდესაც შედეგი თვალსაჩინოა.

6. ან გადაიტანეთ ყურადღება იმაზე, რაც გიყვართ

ფიზიკური ვარჯიშების ბოლომდე შესასრულებლად საყვარელი სერიალის ყურებაც დაგეხმარებათ. გაწელვების ან ბილიკზე სირბილის დროს ტელევიზორის ყურება სცადეთ და დრო ისე სწრაფად გავა, რომ გაკვირვებულიც კი დარჩებით.

7. აკონტროლეთ პროგრესი

მიღწეული პროგრესის კონტროლიც მნიშვნელოვანია, რადგან საბოლოო მიზნისკენ მიმავალ რთულ გზაზე, ნებისმიერი პატარა მიღწევის გაანალიზება და აღნიშვნა ორმაგი ენერგიით დაგმუხტავთ.

8. წინასწარ დაგეგმეთ

წინასწარ დაგეგმეთ, რომ გემრიელი ლანჩის შემდეგ აუცილებლად გადაიხდით კომუნალურ გადასახადებს, ან კიდევ ერთ სერიასაც უყურებთ და შემდეგ ჭურჭელს გარეცხავთ.

9. დაიხმარეთ წარმოსახვის უნარი

წარმოიდგინეთ, რომ ჭურჭლის გარეცხვა არასასიამოვნო მოვალეობა კი არ არის, არამედ ერთგვარი მადლიერების გამოხატვა თქვენი მზრუნველი ოჯახის წევრების მიმართ.

10. იმპულსებს არასდროს დანებდეთ

არასდროს მისცეთ იმპულსებს საშუალება, რომ მნიშვნელოვანი საქმის გაკეთებაში ხელი შეგიშალოთ, რადგან თვალსაჩინო შედეგით ორმაგად ისიამოვნებთ.