დღეს, 28 მარტს ნატო-საქართველოს სწავლება 2019-ს ვაზიანის სამხედრო ბაზაზე ნატოს სამხედრო კომიტეტი და მისი თავმჯდომარე, ავიაციის მთავარი მარშალი სერ სტიუარტ პიჩი სტუმრობს. ღონისძიებაზე სიტყვით გამოსვლისას პრემიერ-მინისტრმა მამუკა ბახტაძემ თქვა, რომ ნატო-საქართველოს არსებითი პაკეტის ფარგლებში სწავლების ჩატარება ნიშნავს, უფრო მეტ საქართველოს ნატოში და უფრო მეტ ნატოს საქართველოში:

"საქართველოში მრავალეროვანი სწავლების ჩატარება, რომელშიც 24 მოკავშირე და პარტნიორი ქვეყანაა ჩართული, კიდევ ერთი დასტურია იმისა, რომ ალიანსი მტკიცე მხარდაჭერას უცხადებს ჩვენს ქვეყანას. ეს არის ნატოს პირველი მრავალეროვანი სწავლება, რომელსაც თავიდან ბოლომდე ხელმძღვანელობს საქართველო".

ნატო-საქართველო 2019 წლის სამხედრო სწავლებაში მონაწილე სამხედროებს სიტყვით მიმართა პრეზიდენტმა სალომე ზურაბიშვილმა. მან საქართველოს მიერ არჩეულ კურსზე ისაუბრა და აღნიშნა, რომ ერთადერთი სწორი გადაწყვეტილებაა: "მეტი ნატო საქართველოში და მეტი საქართველო ნატო-ში".

პრეზიდენტმა თავის გამოსვლაში თქვა, რომ ქვეყნის თავდაცვისუნარიანობის გაძლიერება არავის წინააღმდეგ არ არის მიმართული და მუქარა საქართველოს მიმართ არ არის გამართლებული:

"საქართველო თავისუფალი სუვერენული ქვეყანაა და ის თავისუფლად აკეთებს თავის არჩევანს და ირჩევს მოკავშირეებს".

სწავლების ფარგლებში საქართველოს თავდაცვის ძალების წარმომადგენლები კრიზისის საპასუხო ოპერაციების დაგეგმვისა და აღსრულებისთვის საჭირო უნარ-ჩვევებს, ნატოს წევრი და პარტნიორი ქვეყნების წარმომადგენლებთან ერთად აუმჯობესებენ.

სამეთაურო-საშტაბო სწავლებაში 350-მდე სამხედრო და სამოქალაქო პირი მონაწილეობს. მრავალეროვნული, ბრიგადის დონის საშტაბო სწავლება მიზნად ისახავს საქართველოს, ნატოს წევრი და პარტნიორი ქვეყნების ურთიერთთავსებადობის ამაღლებას, ასევე საქართველოს თავდაცვის ძალების მართვისა და კონტროლის შესაძლებლობების განვითარებას. სწავლება ოფიციალურად ხვალ დაიხურება.