საქართველოს პრემიერ-მინისტრმა მამუკა ბახტაძემ დღეს, 13 თებერვლის მთავრობის სხდომის დაწყებამდე გამართულ ბრიფინგზე სასამართლო სისტემა შეაფასა და თქვა რომ ამ მხრივ ქვეყანამ "ძალიან მნიშვნელოვანი პროგრესს მიაღწია".

"ჩვენ შევძელით და მოვხსენით ის პოლიტიკური წნეხი, რომელიც 2012 წლამდე იყო სასამართლოში. რა თქმა უნდა, ეს არ ნიშნავს, რომ ჩვენ არ უნდა გავაგრძელოთ ამ გზით სიარული", — თქვა პრემიერმა.

ტვ პირველის ჟურნალისტის კითხვის პასუხად, ბახტაძემ თქვა, რომ აღმასრულებელი ხელისუფლების ჩართულობა მოსამართლეების დანიშვნაში, სახელებისა და გვარების განხილვაში და ა.შ. "სრულად მიუღებელია".

"მე არაერთხელ განვაცხადე, რომ სასამართლოს რეფორმა არის ძალიან სენსიტიური თემა და აქ ყველას ჩართულობა ძალიან მნიშნველოვანია, მაგრამ ამავე დროს დავაფიქსირე აღმასრულებელი ხელისუფლების ძალიან მკაფიო პოზიცია, რომ ჩვენ ეს ჩავაბარეთ წარსულს. მე, ისევე როგორც თქვენს კითხვაში, ბევრ სხვა კითხვაშიც ეს ქვეტექსტი დამინახავს, რომ აღმასრულებელი ხელისუფლება, ვინაიდან თავის დროზე იყო ჩართული, მათ შორის მოსამართლეთა დანიშვნაში, ეს ასე უნდა გაგრძელდეს და ეს არის ბუნებრივი – ეს არის მახინჯი, ეს არის სიმახინჯე", — ამბობს პრემიერი.

ბახტაძის თქმით, 2012 წლიდან სტრასბურგის სასამართლოსადმი მიმართვიანობა საქართველოდან 11-ჯერ შემცირებულია.

სასამართლოს რეფორმა

2019 წელს ახალი კონსტიტუციის მიხედვით, უზენაეს სასამართლოში დამატებით 18 მოსამართლე უნდა დაინიშნოს. იუსტიციის უმაღლესი საბჭოს მიერ პარლამენტში წარდგენილ 10 მოსამართლეობის კანდიდატს ქართულ ოცნებაში დაპირისპირება მოჰყვა. უთანხმოების მიზეზი კრიტერიუმების გარეშე შერჩეული მოსამართლეობის კანდიდატები და ამ სიაში ნაციონალურ მოძრაობასთან დაკავშირებული მოსამართლეები იყვნენ. ეკა ბესელიამ განაცხადა, რომ სწორედ მოსამართლეთა სიის გამო დატოვა იურიდიულ საკითხთა კომიტეტის თავმჯდომარის პოსტი. ის მოუწოდებდა იუსტიციის უმაღლეს საბჭოს უკან გაეწვია მოსამართლეთა 10-კაციანი სია.

საქართველოს პარლამენტის თავმჯდომარე ირაკლი კობახიძე იუსტიციის უმაღლესი საბჭოს მდივანს, გიორგი მიქაუტაძეს რამდენჯერმე შეხვდა. ბოლო შეხვედრის შემდეგ, პარლამენტის თავმჯდომარემ განაცხადა, რომ ჯერ მოსამართლეობის კანდიდატების შერჩევისა და დამტკიცების პროცედურების და კრიტერიუმები გაიწერება და სიას მხოლოდ ამის შემდეგ განიხილავენ. კობახიძემ ასევე განმარტა, რომ კანონს უკუძალა ექნება, ანუ სიის განხილვა, რომელიც ახლა პარლამენტშია, ან ტექნიკურად შეჩერდება ან ახალი სია შემუშავდება. იუსტიციის უმაღლესი საბჭოს მდივნის განმარტებით, სიის უკან გაწვევის სამართლებრივი ნორმა არ არსებობს.

უზენაესის მოსამართლეთა არჩევისა და დამტკიცების წესზე რამდენიმე კანონპროექტი მომზადდება. საპარლამენტო უმრავლესობა კანონპროექტზე სასამართლო რეფორმის ჯგუფში იმუშავებს. ინდივიდუალურ კანონპროექტზე მუშაობს დეპუტატი ეკა ბესელიაც. მისი თქმით, ის თავის ხედვას სასამართლო რეფორმის სამუშაო ჯგუფში წარადგენს. თუმცა, გაურკვეველია, ჩართავენ თუ არა ამ ჯგუფის მუშაობაში. იუსტიციის უმაღლესი საბჭოს არამოსამართლე წევრებმა, ნაზი ჯანეზაშვილმა და ანა დოლიძემ პარლამენტში ახალი კანონპროექტი უკვე დაარეგისტრირეს.

ამავე თემაზე: