ბავშვის IQ-ს ამაღლებამდე ერთ-ერთი საუკეთესო გზა წიგნის კითხვაზე გადის. იმაში, რომ პატარა ადამიანებმა კითხვა ადრეული ასაკიდან შეიყვარონ, უფროსების დამოკიდებულებებსა და ქცევებს მნიშვნელოვანი როლი ენიჭებათ.

ბავშვისთვის წიგნის შეყვარება სწორი აღზრდის ერთ-ერთი ნაწილია. რა უნდა გააკეთოს მშობელმა / უფროსმა იმისთვის, რომ მათ კითხვის ინტერესი გაუღვივონ? გთავაზობთ 5 რჩევას.

1. თავად წაუკითხეთ

წაუკითხეთ ბავშვებს წიგნები ადრეული ასაკიდან და კითხვის პროცესში განასახიერეთ პერსონაჟები ხმებით. წაუკითხეთ მას შემდეგაც, როცა მათ კითხვა ეცოდინებათ, საინტერესო ადგილზე შეჩერდით და უთხარით, რომ სხვა საქმე გაქვთ. ამ შემთხვევაში ბავშვი თავად აირჩევს, გააგრძელოს თუ არა კითხვა.

2. წაიყვანეთ წიგნების მაღაზიაში

თუ სახლში წიგნების კოლექცია გაქვთ, ეს ნიშნავს, რომ უკვე ერთი ნაბიჯით მიუახლოვდა თქვენი შვილი წიგნების სიყვარულს.

სხვა შემთხვევაში, ის ბიბლიოთეკაში ან წიგნების მაღაზიაში შეგიძლიათ წაიყვანოთ. თუ ეს სისტემატიურად განმეორდება, წიგნები მისთვის ძვირფასი გარემოს განუყოფელი ნაწილი გახდება. ამასთან ერთად, შეგიძლიათ წიგნების გამყიდველს და ბიბლიოთეკარს განსაზღვრული ასაკისთვის შესაბამისი წიგნის არჩევაში სთხოვოთ დახმარება. ამ ორიდან ბიბლიოთეკა კიდევ უფრო კარგი არჩევანია, რადგან ბავშვებს ეცოდინებათ, რომ იქედან წიგნის წამოღებას უფასოდ შეძლებენ და დროულად დაბრუნების პირობასაც დადებენ.

3. აჩუქეთ წიგნები

სწორად შერჩეულ წიგნზე უკეთესი საჩუქარი ალბათ არ არსებობს. არაა აუცილებელი, რომ დაბადების დღე იყოს. მოიძიეთ ინტერნეტში საუკეთესო საბავშვო წიგნები, ან ისინი, რომლების შესახებაც პოპულარული ფილმებია გადაღებული და უთხარით, რომ ფილმის ნახვისთვის ჯერ წიგნი უნდა წაიკითხოს.

4. არ აიძულოთ კითხვა

ვერაფერს შეაყვარებთ ბავშვს იძულებით. შეიძლება ასწავლოთ, მაგრამ ეს მათთვის ვალდებულებასთან და უარყოფით ემოციასთან იქნება დაკავშირებული. შეგიძლიათ წაახალისოთ, რომ გვიანობამდე ფხიზლად დარჩენის საშუალებას მისცემთ, თუ წაიკითხავს.

5. აჩვენეთ, რომ თქვენც გიყვართ კითხვა

ბავშვები ხშირად აკოპირებენ უფროსების ქცევებს. ისინი მათთვის ქცევის მოდელები არიან. საწყის ეტაპზე თუ იმავე წიგნით დაინტერესდებით, რომელსაც თქვენი პატარა მეგობარი კითხულობს, მას საშუალებას მისცემთ, რომ გაგიზიაროთ თავისი აღფრთოვანება და აზრები სხვადასხვა პერსონაჟის შესახებ. თუმცა გახსოვდეთ, რომ ბავშვებსაც ისევე სძულთ სპოილერები, როგორც თქვენ.

იმისთვის, რომ უკეთ გაიგოთ იმ გზებზე, რომლებიც ბავშვის მკითხველად ჩამოყალიბებას ხელს შეუწყობს, უყურეთ რუსთავი 2-ის გადაცემა სხვა შუადღეს.