თბილისის საქალაქო სასამართლომ არაგანზრახ მკვლელობისთვის ინტერპოლის მიერ ძებნილ ბრიტანეთის მოქალაქეს, ჯეკ შეფერდს სამთვიანი საექსტრადიციო პატიმრობა შეუფარდა.

ჯეკ შეფერდი პოლიციას 23 იანვარს ჩაბარდა. რუსთავი 2-თან ექსკლუზიურ ინტერვიუში შეფერდი ამბობს, რომ გარდაცვლილის მამა პენიტენციურ სისტემაში მუშაობს და დაემუქრა, რომ მას ციხეში ცუდი დღეები ელოდა. შეფერდი ბრალდებას არ აღიარებს და აცხადებს, რომ იმ ავარიის დროს, როცა ახალგაზრდა ქალი გარდაიცვალა ნავს თავად არ მართავდა და ეს სასამართლომაც დაადგინა. შეფერდი უარყოფს იმასაც, რომ ინციდენტის დროს ნასვამი იყო.

მანამდე, BBC-მ გაავრცელა ინფორმაცია, რომ ჯეკ შეფერდი მარტიდან თბილისში იმალებოდა. გამოცემა წერდა, რომ დაღუპულ ქალსა და ბრალდებულ კაცს მდინარე ტემზაზე პაემანი ჰქონდათ. მათ ნავით გაისეირნეს, რომელიც მამაკაცის თქმით, მას ეკუთვნოდა. ნავი, დაუდგენელი მიზეზით, ხიდის კონსტრუქციას შეეჯახა, რის შემდეგაც ამოტრიალდა და ისინი წყალში აღმოჩნდნენ. მამაკაცმა გადარჩენა შეძლო, ქალი კი დაიღუპა.

კაცი 2018 წლის 26 იანვარს სასამართლომ გირაოს სანაცვლოდ გაათავისუფლა. ივლისში კი, ქალის არაგანზრახ მკვლელობაში დამნაშავედ ცნო. ჯეკ შეფერდი პირველი სასამართლო სხდომის შემდეგ აღარ გამოჩენილა. დაღუპული ქალის ოჯახი მოითხოვს, ჯეკ შეფერდმა მისი ქმედებებისთვის პასუხი აგოს.