ელიზაბეტ მოსს, რომელიც Handmaid's Tale-ში შესრულებული როლისთვის ოქროს გლობუსზე საუკეთესო მსახიობი ქალის ჯილდოზე იყო ნომინირებული, სასიამოვნო და ამაღელვებელი საღამო ჰქონდა.

ამის ერთ-ერთი მიზეზი ტეილორ სვიფტისგან მიღებული სიურპრიზიც იყო. ამერიკელმა პოპ-ვარსკვლავმა მას ვიდეო მესიჯი გაუგზავნა, რომელიც მოსს წითელ ხალიჩაზე E!-ს ჟურნალისტმა წარუდგინა.

მოსმა 2018 წლის ინტერვიუში თქვა, რომ მხევლის წიგნის გადაღების პარალელურად, ის და სხვა მსახიობები მძიმე სცენების ჩაწერის დასრულების შემდეგ, ტეილორ სვიფტის სიმღერებს უსმენდნენ და მღეროდნენ, რაც მათ განტვირთვაში ეხმარებოდათ.

სწორედ ამის გამო მოუხადა მას მადლობა სვიფტმა:

"გამარჯობა, მე ტეილორი ვარ და ეს ვიდეო ელიზაბეტისთვის ჩავწერე. მადლობა, რომ ინტერვიუში თქვი, რომ მხევლის წიგნის გადაღებისას ჩემს სიმღერებს უსმენდი. განსაკუთრებით იმიტომ, რომ სერიალის დიდი ფანი ვარ. იმ დღეს დედაჩემმა და ყველა მეგობარმა დამირეკეს და შენი სიტყვების შესახებ მითხრეს, რადგან მათ იციან, როგორ მიყვარს მხევლის წიგნი".

ტეილორმა მოსს სასიამოვნო საღამო უსურვა და ნომინაციაც მიულოცა. მესიჯის მოსმენისას, ელიზაბეტი რეაქცია ემოციური იყო, ის გაოცებისგან და სიხარულისგან კისკისებდა. მან ტეილორის მიწვევაც მიიღო:

"ღმერთო, რა სიგიჟეა! არც კი მჯერა, რომ მან ჩემ შესახებ იცის. დიდი მადლობა! ტეილორ, სიამოვნებით გესტუმრებოდი და გავატარებდი დღეს შენთან ერთად".

იმედს ვიქონიებთ, რომ ტეილორი და ელიზაბეტი ერთმანეთს ოქროს გლობუსის კულისებშიც უკვე შეხვდნენ, რადგან სვიფტს საზოგადოებისთვის კიდევ ერთი სიურპრიზი ჰქონდა — ის მოულოდნელად წარმდგენის როლში მოგვევლინა და იდრის ელბასთან ერთად საუკეთესო ორიგინალური სიმღერის გამარჯვებული დაასახელა.

ნომინაციაში ლედი გაგამ გაიმარჯვა, მას ოქროს გლობუსი A Star Is Born-სთვის დაწერილმა Shallow-მ მოუტანა.

იდრის ელბა და ტეილორ სვიფტი ერთად მონაწილეობენ მიუზიკლის Cats-ის ეკრანიზაციაში. ფილმი, სავარაუდოდ, 2019 წლის 20 დეკემბერს გამოვა.

დაჯილდოებაზე ასევე იმყოფებოდა ბრიტანელი მსახიობი და ტეილორის შეყვარებული, ჯო ალვინი, თუმცა წყვილი წითელ ხალიჩაზე ერთად არ გამოჩენილა.