შინაგან საქმეთა სამინისტრომ განსაკუთრებით დიდი ოდენობით ჰეროინის
საქართველოში უკანონოდ შემოტანის ბრალდებით სასაზღვრო სექტორ სადახლოს ტერიტორიაზე ერთი პირი დააკავა. ბრალდება 15-დან 20 წლამდე ან უვადო თავისუფლების აღკვეთას ითვალისწინებს.

გამოძიების ცნობით, ირანის მოქალაქემ საქართველო-სომხეთის სახელმწიფო საზღვარი სასაზღვრო-საკონტროლო გამტარი პუნქტის გვერდის ავლით, უკანონოდ გადმოკვეთა.

"სამართალდამცველებმა, დაკავებულის პირადი ჩხრეკისას, დაახლოებით, 8 კილო და 500 გრამი ჰეროინის შემცველი ნარკოტიკული საშუალება, ასევე, ბუპრენორფინის შემცველი 10 აბი და 1 შეკვრა მეტამფეტამინი ამოიღეს", — ნათქვამია შსს-ს მიერ გავრცელებულ განცხადებაში.

გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და საქართველოში უკანონოდ შემოტანის მუხლებით მიმდინარეობს.