51-ე სკოლის დირექტორის მოადგილე, თინათინ ყენია თანამდებობის დატოვების მიზეზებს განმარტავს. როგორც ყენია On.ge-სთან საუბარში ამბობს, მან თანამდებობა ორი თვის წინ დატოვა და აღნიშნული გადაწყვეტილება ხორავას ქუჩაზე მომხდარ ტრაგედიას უკავშირდება.

"ჩემი გადადგომა უკავშირდება, რა თქმა უნდა, ამ ტრაგედიას", — ამბობს ყენია.

როგორც ყენია აღნიშნავს, ეს მისი პირადი გადაწყვეტილება იყო, რადგან იქ სადაც ასეთი ტრაგედია მოხდა, ვერ გაჩერდებოდა.

"მე ვფიქრობ, რომ იქ სადაც ხარ და სადაც მოღვაწეობ, სადაც აკეთებ ყველაფერს, რომ იყოს ყველაფერი კარგად და იქ მოხდება ასეთი რამ, ალბათ აღარ უნდა გაჩერდე", — განაცხადა ყენიამ.

გარდა 51-ე სკოლის დირექტორის მოადგილეობისა, ყენია იმ კლასის დამრიგებელიც იყო, სადაც ხორავას ქუჩაზე მომხდარი დაპირისპირების დროს გარდაცვლილი, დავით სარალიძე სწავლობდა.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა, თანამდებობიდან გადადგა. მკვლელობის საქმეზე ახალი გარემოებების დადგენის მიზნით, შსს-მ ხელახალი გამოძიება დაიწყო, რომელსაც უშუალოდ გიორგი გახარია ხელმძღვანელობს. გამოძიების ფარგლებში მირზა სუბელიანი დანაშაულის შეუტყობინებლობისთვის, ხოლო მერაბ მორჩაძე მოწმეზე ზემოქმედების ბრალდებით დააკავეს.

2017 წლის პირველ დეკემბერს, თბილისში, ხორავას ქუჩაზე არასრულწლოვნებს შორის დაპირისპირების შედეგად დაჭრილი სკოლის მოსწავლე საავადმყოფოში მისვლამდე დაიღუპა. ცივი იარაღით დაჭრილი მეორე არასრულწლოვანი, მომხდარიდან მეორე დღეს საავადმყოფოში გარდაიცვალა.

გაიგე მეტი: