ბავშვობაში ყველას გვიფიქრია კოსმოსში გაფრენაზე, თუმცა წლების შემდეგ იმ აზრამდე მივსულვართ, რომ დედამიწიდან თვალუწვდენელ სივრცეში გამგზავრება იაფი სიამოვნება ნამდვილად არ იქნებოდა.

ცოტა ხნის წინ კი ისიც გაირკვა, კონკრეტულად რა თანხაზეა საუბარი. Amazon-ის დამფუძნებლის, ჯეფ ბეზოსის კომპანია Blue Origin თითო ადამიანს ორბიტაზე დაახლოებით $200 000-ად გაასეირნებს.

Blue Origin ადამიანების გაგზავნას ერთ-ერთი ხომალდით, New Shepard-ით აპირებს, რომელსაც თავზე მგზავრების გადასაყვანი კაფსულა ექნება დამაგრებული. რაკეტაში ექვსი ადამიანის ადგილია. კაფსულას დიდი ზომის ფანჯრები ექნება, რათა მგზავრები დედამიწის ხედით დატკბნენ. რამდენიმე წუთის განმავლობაში კი ისინი უწონადობასაც გამოცდიან.

აღნიშნულმა ამბავმა ბრტყელი დედამიწის თეორიის მომხრეებში დაბნეულობა გამოიწვია, რადგან მათ უკვე სულ რაღაც $200 000-ად შეეძლებათ მრგვალი დედამიწის საკუთარი თვალებით დანახვა.

Blue Origin-მა რაკეტა New Shepard-ის რვა სატესტო გაშვება, რომელშიც რეზინის ადამიანები ისხდნენ, უკვე განახორციელა. კომპანია რეზინის ადამიანების ნამდვილებით ჩანაცვლებას 2019 წელს აპირებს.

მგზავრობა ერთი შეხედვით საკმაოდ კომფორტულიც ჩანს, თუ არ შეიმჩნევთ, რომ სავარძელზე იქნებით მიჯაჭვული.