მწერალ გურამ მეგრელიშვილის ახალი წიგნის "საქართველოს ალტერნატიული რუკა" პრეზენტაცია მეტრო უნივერსიტეტში ღამის პირველ საათზე გაიმართა. ეს ერთგვარი ამოვარდნა იყო უკვე დამკვიდრებული ფორმატიდან, რომელშიც მკითხველები და მწერლები რომელიმე ვინტაჟურ კაფეში იკრიბებიან და ღვინოს წრუპავენ ხოლმე.

ამჯერად პრეზენტაციაზე მისულმა სტუმრებმა მეტროს უცნობი მხარეც დაინახეს და გვირაბებშიც იარეს და თუ რატომ - ამის გასაგებად, წიგნი აუცილებლად უნდა წაიკითხოთ.

მანამდე კი, უბრალოდ მოგიყვებით ზუსტად იმას, რაც თქვენი ცნობისმოყვარეობის აღსაძვრელად საკმარისია.

"საქართველოს ალტერნატიული რუკა" პირველი ტურისტული რუკაა წიგნის სახით და პირველი ინტერაქციული რომანი, რომელშიც მკითხველს მოგზაურის გარდა, თანაავტორის როლის მორგებაც შეუძლია.

კიდევ ერთი სიახლე ისაა, რომ ფურცლებზე დატანილია QR კოდები, რომელთა სკანირების შემდეგ წინ შთამბეჭდავი ვიზუალური მასალა გადაგეშლებათ. რაც შეეხება შინაარსს - თავად ავტორი, რომელსაც უკვე 12 წიგნი აქვს დაწერილი, ამბობს, რომ საქმე ცრუ დოკუმენტალისტიკასთან გვაქვს. გურამ მეგრელიშვილი გვიყვება საქართველოზე, რომელიც არ არსებობს, მაგრამ ხელისგაწვდენაზეა. გვაჩვენებს იმას, რაც არ მომხდარა, მაგრამ შეიძლება მომხდარიყო. ლიტერატურის მიზანიც ხომ ფართო გაგებით - სწორედ ესაა.

წიგნი ერთმანეთისგან დამოუკიდებლად განვითარებულ ამბებზე მოგვითხრობს და მასში სიუჟეტი საქართველოს ყველა კუთხეში ვითარდება. მკითხველი სრულად ეფლობა 114 პერსონაჟის ისტორიაში, რომელსაც მწერალი მიზანმიმართული იუმორით აცოცხლებს. სამოქმედო არეალიც წინასწარვე განსაზღვრულია და მოქმედებაც. სიუჟეტი, მართალია ფრაგმენტულად და მრავალმხრივად, მაგრამ მაინც ერთი კონკრეტული საწყისი წერტილის გარშემო ვითარდება.

გურამ მეგრელიშვილის მიერ დახატული ალტერნატიული საქართველო, წარმოსახვითია, მაგრამ ამავე დროს - დამაჯერებელი. სახელები და გვარები, რომლებიც ქართველთა დიდ ნაწილისთვის ბუნებრივად ჟღერს, ამ გამოგონილი სამყაროსკენ ხიდად გვევლინებიან.

ზესტაფონს ბორის აკუნინი სტუმრობს, საქართველოს ახალარჩეული პრეზიდენტის როლი კი გიორგი კეკელიძეს მოურგია. აქ ნახავთ საუნივერსიტეტო ქალაქ ჭიათურასა და ლას-ვეგასად ქცეულ ჯანდარას, ტექნოლოგიური მიღწეევების ცენტრ ლანჩხუთსა და სამეცნიერო ლაბორატორიას, რომელიც ხვამლის მთაზე აუშენებიათ. შეგიძლიათ გონებით ხაშურის დისნეილენდს ეწვიოთ, ან სულაც სვანეთში შეიაროთ ფოლკლორიადაზე. აქ საზღვრები არ არსებობს და კუთხიდან კუთხეში გადასანაცვლებლად რამდენიმესაათიანი მგზავრობაც არ გჭირდებათ.

კიდევ ბევრი რამის მოყოლა შეიძლება, მაგრამ მთავარი მაინც ისაა, თავად რამდენად ჩაერთვებით ამ ლიტერატურულ-ისტორიულ ავანტიურაში, რომელსაც ხელში წიგნის სახით ჩაიგდებთ.

ბოლოს და ბოლოს, ალტერნატიული საქართველოს სცენარი ხომ ყველა ჩვენგანს გვაქვს და თითოეული მათგანი იმდენადვე საინტერესოა, რამდენადაც - თავად გურამ მეგრელიშვილის.

ნახეთ ვიდეო, რომელშიც დათო ტურაშვილი შაბათის შუადღეში ამ წიგნზე საუბრობს