ინსტაგრამი, კერძოდ კი, მისი ისტორიები (Story) სულ მალე მუსიკალური გახდება. ფუნქცია, რომლის სატესტო ვერსიაც მაისში ჩაეშვა, უკვე ექვს ქვეყანაშია ხელმისაწვდომი, მათ შორის -ამერიკის შეერთებული შტატებშიც. ფეისბუქმა ბოლო პერიოდში ცნობილ ლეიბლებთან გააფორმა კონტრაქტი და ისეთი მუსიკოსების საავტორო უფლებები შეისყიდა,როგორებიც არიან ბრუნო მარსი, დუა ლიპა, კელვინ ჰარისი და Guns N' Roses. ბოლო ცვლილებები გვაფიქრებინებს, რომ სნეპჩეტის უკან ჩამოტოვების შემდეგ, ინსტაგრამის მორიგი სამიზნე თინეიჯერებში პოპულარული სერვისი, Musical.Ly-ა.

ახლახან ცნობილი გახდა ისიც, რომ ინსტაგრამის ისტორიებს ყოველდღიურად 400 მილიონი მომხმარებელი ჰყავს. ერთი წლის წინ ეს მაჩვენებელი 250 მილიონი იყო. ეს იმას ნიშნავს, რომ ინსტაგრამის Story ფუნქცია ექვსჯერ უფრო სწრაფად იზრდება, ვიდრე სნეპჩეტის მთლიანი აპლიკაცია, რომელმაც ბოლო 6 თვეში მხოლოდ 13 მილიონი მომხმარებლის მოზიდვა შეძლო.

"ახლა უკვე შეგიძლიათ, სთორის თქვენი ხასიათის შესაბამისი მუსიკა დადოთ და ამ გზით გამოხატოთ, როგორ გრძნობთ თავს", - წერს ინსტაგრამი. ახალი ფუნქციის გამოსაყენებლად, მომხმარებლებმა ფოტოს ან ვიდეოს გადაღების შემდეგ სიმღერის სტიკერი უნდა აირჩიონ. მელოდიის მოძებნა შემსრულებლის, სიმღერის სახელის, ჟანრისა და განწყობის მიხედვით იქნება შესაძლებელი.

გარდა უშუალოდ მომხმარებლების გამოცდილების გაუმჯობესებისა, ინსტაგრამის მუსიკალური ფუნქცია შეიძლება შესანიშნავი ტრამპლინი აღმოჩნდეს ახალბედა მუსიკოსებისთვისაც, რომლებსაც შანსი ექნებათ, საკუთარი სიმღერები პოპულარული გახადონ.

როდის ჩაირთვება ახალი ფუნქცია ყველა ქვეყანაში, ჯერჯერობით უცნობია.