ქალი, რომელსაც მკერდის კიბოს ბოლო სტადია ჰქონდა, ქალაქის საავადმყოფოში გადაიყვანეს. ორ ექიმთან კონსულტაციის შემდეგ, პაციენტს რადიოლოგიური სკანირება ჩაუტარდა. საავადმყოფოს კომპიუტერებმა პაციენტის მონაცემებზე დაყრდნობით დაადგინეს, რომ საავადმყოფოში ყოფნის პერიოდში მისი გარდაცვალების შანსი 9.3% იყო.

ამის შემდეგ, პაციენტს გუგლის უახლესი ტექნოლოგიით ჩაუტარდა გამოკვლევა. ალგორითმმა, რომლითაც ტექნოლოგიების გიგანტი სამედიცინო სფეროში ადგილის დამკვიდრებას აპირებს, ქალის 175 639 მონაცემთა წერტილი შეისწავლა და დაადგინა, რომ მისი გარდაცვალების შანსი 19.9%-ს უდრიდა. პაციენტი რამდენიმე დღეში გარდაიცვალა.

უცნობი ქალის გარდაცვალების შესახებ ანგარიში გუგლმა მაისში გამოაქვეყნა, რომელშიც საუბარი იყო ჯანდაცვის სფეროში ნეირონული ქსელების მეთოდის პოტენციალზე. ეს არის ხელოვნური ინტელექტის პროგრამული უზრუნველყოფის ფორმა, რომელიც განსაკუთრებით კარგად იყენებს მონაცემებს თვითშემეცნებისთვისა და განვითრებისთვის. გუგლმა შექმნა ხერხი, რომელსაც შეუძლია იწინასწარმეტყველოს პაციენტის მდგომარეობის გაუარესება ან გაუმჯობესება, ისევე როგორც ის, თუ რამდენ ხანს მოუწევს პაციენტს საავადმყოფოში ყოფნა, მათი გამოჯანმრთელების პერიოდის დადგენა და სიკვდილის შანსების გამოთვლა.

მედიცინის ექსპერტების გაოცება იმან გამოიწვია, რომ გუგლის მიერ შექმნილ ახალ მეთოდს აქვს უნარი მოიპოვოს და გადაამუშავოს ისეთი მონაცემები, რომელიც აქამდე იკარგებოდა და ხელმისაწვდომი არ იყო. მაგალითად, PDF ფაილებში დაფარული და უაზრო დიაგრამებზე ჩაწერილი ინფორმაცია. ნეირონულმა ქსელმა ეს ინფორმაცია მოიპოვა, გადაამუშავა და იწინასწარმეტყველა მოსალოდნელი შედეგი. ეს ყველაფერი კი, გაცილებით უფრო სწრაფად და უფრო დიდი სიზუსტით შეასრულა, ვიდრე ამ დროისთვის არსებული ტექნოლოგიები ახერხებენ ამას. გუგლის სისტემამ ისიც კი აჩვენა, თუ რა ჩანაწერები გამოიყენა დასკვნის გასაკეთებლად.

გუგლის სამომავლო მისიაა, რომ მისი შექმნილი სისტემა კლინიკებში რაც შეიძლება მალე დანერგოს. ამის შესახებ პროგრამის ხელმძღვანელმა და გუგლის ხელოვნური ინტელექტის დეპარტამენტის დირექტორმა, ჯეფ დინმა ბლუმბერგთან საუბარში განაცხადა. ჯეფ დინის ჯანმრთელობის კვლევის დანაყოფი, რომელსაც "სამედიცინო ტვინსაც" უწოდებენ, აგრძელებს მუშაობს ხელოვნური ინტელექტის შესაძლებლობების დახვეწაზე, რათა სისტემამ უფრო ზუსტად გამოარკვიოს სიმპტომები და დაავადებების სიმძიმის დონე.

დღეს არსებული სისტემები მოუქნელი და არც თუ ისე ზუსტია. მათი გამოყენება ძვირი ჯდება და პლუს, დიდ დროს მოითხოვს. სწორედ ამიტომ, გუგლის სისტემის ინტეგრირება კლინიკებში მნიშვნელოვნად შეცვლის ჯანდაცვის სფეროს.

დროთა განმავლობაში გუგლმა შესაძლოა ამ სისტემის ლიცენზირება მოახდინოს კლინიკებისთვის, ან უბრალოდ მიჰყიდოს მათ კომპანიის ქლაუდ-სერვისის სახით. იმისთვის, რომ პროგრამამ კომერციული ხასიათი მიიღოს, საჭიროა დამატებითი მონაცემების შერგოვება ჯანდაცვის სფეროში ოპერირებადი სხვადასხვა კომპანიებისგან. გუგლს შეუძლია, რომ ეს მონაცემები იყიდოს მათგან, თუმცა შესაძლოა ამას რეგულაციებთან და კლიენტებთან უთანხმოება მოჰყვეს. ამავდროულად გუგლს არაკომერციული შეთანხმება აქვს ჩიკაგოს და სან ფრანცისკოს უნივერსიტეტთან.

კომპანიაში თვლიან, რომ ამ დროისთვის სისტემის ბიზნეს მოდელზე საუბარი ადრეა. მათ სურთ, რომ სისტემის ეფექტურობა არაერთხელ გადაამოწმონ და მხოლოდ ამის შემდეგ დაიწყება მის გაყიდვაზე ფიქრი.