კვირას ღამით, ამერიკელმა მომღერალმა დემი ლოვატომ, გადაწყვიტა, რომ ტვიტერზე ფანები გაეხარებინა და მათ კითხვებზე ეპასუხა.

მომღერალი ალბათ ვერ იფიქრებდა, რომ ის, რაც "გულწრფელი პასუხი" ეგონა, სინამდვილეში პრობლემებს შეუქმნიდა.

როდესაც ფანმა ჰკითხა, გაეხსენებინა, ყველაზე სასაცილო პრანკი, ლოვატომ ასეთი ისტორია მოყვა [ტვიტი უკვე წაშლილია]:

"ვეგასში ყოფნისას, მეძავი დავიქირავე და ჩემს დაცვის წევრთან, მაქსთან, შევუშვი, რომ ის გაეოცებინა. ის მის ოთახში უნებართვოდ შევიდა და გენიტალიებზე წაავლო. მაქსს შიშისგან გული გაუსკდა, ჰაჰაჰაჰაჰა"

ის, რაც დემის ხუმრობა ეგონა, სექსუალური შევიწროებაა და ტვიტერმა მას შესაბამისად უპასუხა.

"ანუ, მან დაიქირავა ვიღაც, რომელიც სხვას სექსუალურად შეავიწროებდა. ყოჩაღ"

"ეს ნორმალური არაა და ძალიან ცუდი საქციელია. დემის მხრიდან ეს სექსუალურ თავდასხმაში ხელშეწყობაა, მეორე ქალის მხრიდან კი, სექსუალური თავდასხმა. რა ამაზრზენია"

ტვიტერის მომხმარებლები წერდნენ, რომ დემის ტვიტი იმის მაგალითია, რატომ არავინ საუბრობს კაცების სექსუალურ შევიწროებაზე.

"მინდა ხმამაღლა ვთქვა, რომ თავდასხმა თავდასხმაა! სტატისტიკური მონაცემებით, ყველაზე ხშირად მსხვერპლებს მათი ნაცნობები ესხმიან თავს. არც კი შემიძლია იმის წარმოდგენა, როგორ უნდა დაიქირავო ვინმე, რომელიც სხვა ადამიანს ასე უნდა მოექცეს და შემდეგ ამას პრანკი უწოდო. სექსუალური თავდასხმის მსხვერპლნი კაცებიც ხდებიან!"

"რა ვისწავლე დღეს: დემი ლოვატოს აზრით, კაცების სექსუალური შევიწროება სასაცილოა. იქნებ 2018 წელს მაინც მივხვდეთ, რომ კაცების მიმართ ასეთი რამ არც ნორმალურია და არც სასაცილო? ახალი ამბავია, რომ კაცებს გრძნობები აქვთ? და ისინიც შეიძლება გახდნენ სექსუალური შევიწროების მსხვერპლნი?"

ამ გამოხმაურების შემდეგ, დემი ლოვატომ ჩათვალა, რომ ინტერნეტი მის საქციელს ძალიან სენსიტიურად მიუდგა:

"შეიძლება დავწერო, რომ ჟელიბონი მინდა და ხალხი ამასაც კი შეურაცხყოფად მიიღებს"

თუმცა მომღერალს არც ამ ტვიტში გაუმართლა, რადგან ხალხმა ის ხელმეორედ გააკრიტიკა.

მოგვიანებით დემიმ პირველი ტვიტი წაშალა და ბოდიში მოუხადა ყველას, ვინც მისი სიტყვები შეურაცხყოფად მიიღო.