მას შემდეგ, რაც გიორგი კვირიკაშვილი პარლამენტის წინ მიმდინარე აქციიდან გააძევეს, მან კანცელარიაში ბრიფინგი გამართა. კვირიკაშვილმა აღნიშნა, რომ ხორავას საქმეზე გამოძიებას კომისია უმოკლეს ვადაში დაიწყებს:

"უმოკლეს ვადაში რიგგარეშე სხდომაზე შეიკრიბება პარლამენტი და დაამტკიცებს კომისიის შემადგენლობას, სადაც რამდენადაც მე ვიცი, შესაძლებელია და კარგიც იქნება ამ შემთხვევაში რომ უმცირესობა იყოს წარმოდგენილი უმრავლესობის სახით და უმოკლეს პერიოდში დაიწყებს კომისია მუშაობას. იმ პერიოდში რა პერიოდიც იქნება ტექნიკურად შესაძლებელი."

კვირიკაშვილმა ბრიფინგზე განაცხადა ისიც, რომ ხვალიდან, პირველი ივნისიდან შსს დაიბრუნებს ხორავას ქუჩაზე მომხდარი მკვლელობის საქმეს პროკურატურისგან გამოძიების პროცესში. მისივე თქმით, ვიცე-პრემიერი გიორგი გახარია წაიყვანს გამოძიების პროცესს.

აქციაზე პრემიერის მისვლისას დემონსტრანტები სკანდირებდნენ "წადი" და მას ბოთლები ესროლეს. ზაზა სარალიძემ განაცხადა, რომ აქციაზე კვირიკაშვილი მივიდა არა იმიტომ რომ მისთვის თანაეგრძნო, არამედ იმისთვის, რომ ისევ მოეტყუებინა.

აქციის მონაწილეების ერთ-ერთი მთავარი მოთხოვნაა გადადგეს მთავრობა. მათ პრეზიდენტს მოუწოდეს, რომ შეუერთდეს აქციას და გადაააყენოს მთავრობა.