პრეზიდენტმა გიორგი მარგველაშვილმა შეწყალების საქმეებთან დაკავშირებით, შინაგან საქმეთა სამინისტროს პასუხისმგებლობაზე ისაუბრა და უწყება მასთან კომუნიკაციის არქონაში დაადანაშაულა. აჭარის ტელევიზიასთან საუბრისას, გიორგი მარგველაშვილმა აღნიშნა, რომ შსს მას შეწყალებულების მიერ განმეორებით ჩადენილ დანაშაულზე სტატისტიკას არ უზიარებს:

"ამ პიარომში კომიკურად გამოვიდა, რომ თურმე შს სამინისტრო რაღაცა მასალას ამუშავებს, რაღაცა სტატისტიკა აქვს, მე არ მეუბნებიან ამის თაობაზე. სტრუქტურა, რომელიც ვალდებულებაც არის, რომ რაც შეიძლება მეტი გააკეთოს უკეთესი კრიმინოგენული ვითარებისთვის, პრეზიდენტს არ უზიარებს ამ სტატისტიკას და მე კითხვა მიჩნდება რას ნიშნავს ეს. მე რა შს სამინისტროსგან დაკვირვების და დამუშავების რეჟიმში ვარ? თუ შენ რაღაც ინფორმაციას ფლობ, მე რატომ არ მიზიარებ?"

პრეზიდენტი მმართველი გუნდის მხრიდან ბრალდებებს პროპაგანდას უწოდებს:

"ბოლოს უკვე ისე იყო, რომ მავნებელი პრეზიდენტი ძირს უთხრის ქვეყნის უსაფრთხოებას. ეს ტექსტები, მე არ ვიცი ვინ წერდა, პირდაპირ "ენკავედეს" პრესსამსახურის ვინმე ნარჩენი იყო, რომელიც ამ ტექსტებში ცდილობდა ჩვენი საზოგადოებისთვის ეს თემები მიეწოდებინა თუ არა".

პრეზიდენტის ბრალდებებს შს მინისტრის მოადგილემ, ნათია მეზვრიშვილმა უპასუხა. მისი თქმით, უწყება შეწყალების საკითხზე საუბრისას, პერსონალურ პასუხისმგებლობას არავის აკისრებს.

17 აპრილს შინაგან საქმეთა მინისტრმა, გიორგი გახარიამ ჟურნალისტებთან საუბრისას თქვა, რომ ბოლო წლებში შეწყალების აქტით განთავისუფლებულ მსჯავრდებულთა განმეორებითი დანაშაულის მაჩვენებელი ძალიან მაღალია.

პრეზიდენტის მიერ განსაკუთრებით მძიმე დანაშაულისთვის მსჯავრდებულებსა და მათ მიერ განმეორებით ჩატარებულ დანაშაულზე საუბარი მას შემდეგ დაიწყო, რაც 13 აპრილს თბილისში, ბარნოვის ქუჩაზე 25 წლის გოგოს შვილების თანდასწრებით ყელი გამოჭრეს. ის ადგილზევე გარდაიცვალა. ოჯახში ძალადობისთვის დაპატიმრებული, მკვლელობაში ბრალდებული მამინაცვალი, რამდენიმე თვის წინ შეწყალების აქტის საფუძველზე გაათავისუფლეს.

გამოძიების ინფორმაციით, მკვლელობამდე რამდენიმე საათით ადრე, მოკლული და დედამისი პოლიციის განყოფილებაში გამოცხადდნენ და დედის მიმართ შემაკავებელი ორდერის გამოწერა ითხოვეს.