დღეს ჩემპიონთა ლიგის 1/4 ფინალის განმეორებითი მატჩები გაიმართა. ლივერპულისა და რომას შემდეგ, კიდევ ორი ნახევარფინალისტის ვინაობა გაირკვა.

მიუნხენის ბაიერნმა შინ სევილიას უმასპინძლა. მატჩი უგოლო ფრით დასრულდა, თუმცა პირველ შეხვედრაში მოპოვებული გამარჯვების შემდეგ, რომელიც მიუნხენურმა გუნდმა 2:1 მოიგო, ნახევარფინალში სწორედ გერმანული გუნდი გავიდა.

დრამატულად წარიმართა დაპირისპირება რეალ მადრიდსა და იუვენტუსს შორის. სანტიაგო ბერნაბეუზე წაგებული მატჩის შემდეგ, იუვენტუსს მომდევნო ეტაპზე გასასვლელად 4 უპასუხო გოლის გატანა სჭირდებოდა. ეს ერთიშეხედვით წარმოუდგენელი ამოცანა, იტალიელებისთვის გამოწვევა აღმოჩნდა.

იუვენტუსმა მადრიდულ კლუბს პირველივე წუთებიდან შეუტია და მანჯუკიჩის დამსახურებით პირველი გოლი მეორე წუთზე გაიტანა. 92-ე წუთისთვის, იუვენტუსი 3-0 იგებდა და დამატებით დრომდე აღარაფერი აკლდა, რა დროსაც მსაჯმა იუვენტუსის კარში პენალტი დანიშნა. 11-მეტრიანი რონალდუმ ზუსტად შეასრულა და თავისი გუნდი ნახევარფინალში გაიყვანა.