მოქალაქეები, რომლებიც სამხედრო სავალდებულო სამსახურს, რელიგიური თუ სხვა მიზეზებით თავს არიდებენ, ალტერნატიულ სამხედრო სამსახურს საგანგებო სიტუაციების მართვის სამსახურში გაივლიან. ამის შესახებ საგანგებო სიტუაციების მართვის სამსახურის უფროსის მოადგილის შალვა ხუციშვილის მიერ სააგენტო ინტერპრესნიუსისთვის მიცემულ ინტერვიუშია ნათქვამი.

დღეს მოქმედი კანონმდებლობით, სამხედრო სამსახურში არ იწვევენ იმ პირებს, რომლებიც მღვდელმსახურები არიან ან სასულიერო სასწავლებელში სწავლობენ. ახალ ინიციატივაზე, რომელშიც კანონის ეს მუხლი ნაწილობრივ იცვლება, საქართველოს თავდაცვისა და უშიშროების კომიტეტი საგანგებო სიტუაციების მართვის სამსახურთან ერთად მუშაობს.

შალვა ხუციშვილის თქმით, იმ ადამიანებს, რომლებიც რელიგიური თუ სხვა მიზეზებით თავს არიდებენ შეიარაღებულ ძალებში სამსახურს, საგანგებო სიტუაციების მართვის სამსახური გაიწვევს. ალტერნატიული სამხედრო სამსახურის მოხდის შემდეგ მოქალაქეს მათ უწყებაში დასაქმების საშუალებაც ექნებათ.

"შევქმნით პირობებს იმისთვის, რომ მათ ალტერნატიული სამხედრო სამსახური საგანგებო სიტუაციების მართვის სამსახურის, სამაშველო-სახანძრო დანაყოფებში მოიხადონ, დაეუფლონ მეხანძრე-მაშველის უნარ-ჩვევებს და უკვე კონკრეტული უნარ-ჩვევებით სარეზერვო სამსახურშიც ჩაირიცხონ", - ამბობს შალვა ხუციშვილი.

On.ge-ს აინტერესდება გავრცელდება თუ არა ყველა რელიგიურ ორგანიზაციაზე ალტერნატიულ სამხედრო სამსახურში გაწვევის ახალი ინიციატივა. საგანგებო სიტუაციების მართვის სამსახურში გაგვიმარტეს, რომ ალტერნატიული სამხედრო სამსახურის ხედვასა და ახალ უწყებაში დაგეგმილ ცვლილებებთან დაკავშირებით 30 მარტს პრეზენტაცია იგეგმება. 30 მარტამდე კი ამ თემაზე არ ისაუბრებენ.

უცნობია, სავალდებულო იქნება თუ არა საგანგებო სიტუაციების მართვის სამსახურის მიერ შემოთავაზებული ატერნატიული სამხედრო სამსახური. კანონპროექტის დეტალების გასარკვევად On.ge თავდაცვისა და უშიშროების კომიტეტის თავმჯდომარესთან ირაკლი სესიაშვილთან დაკავშირებას მთელი დღის განმავლობაში ცდილობდა, თუმცა უშედეგოდ.

გირჩის მიერ სავალდებულო სამხედრო სამსახურის გადასავადებლად შექმნილი რელიგიური ორგანიზაცია უკვე 3000-ზე მეტ ახალწვეულს აერთიანებს. ორგანიზაცია წინა წელს, მარტში დაარსდა. ერთი წლის თავზე კი ხელისუფლება მუშაობს ინიციატივაზე, რომლითაც რელიგიური თუ სხვა მიზეზებით ახალწვეულები სამხედრო სამსახურს თავს ვერ აარიდებენ.

ბიბლიური თავისუფლების მთავარი მღვდელთმსახურის ნიკა ობოლაძის შეფასებით, ხელისუფლება ცდილობს წარმოაჩინოს, რომ გირჩის რელიგიური ორგანიზაციის ინიციატივის შესაჩერებლად რაიმეს აკეთებს.

"ისინი ცდილობენ წარმოაჩინონ, რომ სავალდებულო სამხედრო სამსახურში რაღაც რეფორმას ატარებენ, თუმცა არაფერსაც არ აკეთებენ. ეს სისტემა მოშაშლელია და არ ემსახურება ქვეყნის თავდაცვისუნარიანობის გაზრდას. არაფერი გამოუვათ", - უთხრა On.ge-ს ნიკა ობოლაძემ.

გაიგეთ მეტი: