შინაგან საქმეთა მინისტრის მოადგილემ, შალვა თადუმაძემ, ამერიკის შეერთებული შტატების თავდაცვის საფრთხის შემცირების სააგენტოს ახლად დანიშნულ კავკასიის რეგიონულ ხელმძღვანელთან - ენტონი სპირსთან გაცნობითი ხასიათის შეხვედრა გამართა.

როგორც შსს იტყობინება, შეხვედრას ასევე ესწრებოდნენ ამერიკის შეერთებული შტატების თავდაცვის საფრთხის შემცირების სააგენტოს საქართველოს პროგრამების მენეჯერი - სტეფანი პენინგტონი და სამინისტროს სხვადასხვა დანაყოფის ხელმძღვანელი პირები.

შსს-ის ინფორმაციით, შეხვედრის ფარგლებში მხარეებმა უწყებებს შორის არსებული თანამშრომლობისა და მიმდინარე პროექტების ფარგლებში განხორციელებული და დაგეგმილი ღონისძიებები განიხილეს და სამომავლო ურთიერთობის პრიორიტეტულ მიმართულებებზე ისაუბრეს. განსაკუთრებული ყურადღება გამახვილდა სააგენტოს მიერ, „ქიმიური უსაფრთხოების პროექტის“ ფარგლებში, საექსპერტო-კრიმინალისტიკური დეპარტამენტისათვის გადმოცემული ქიმიური ტრიაჟის ექსპერტიზის ლაბორატორიის მნიშვნელობაზე, რამაც მნიშვნელოვნად გააუმჯობესა დანაყოფის შესაძლებლობები.

შსს-ის პრესრელიზის თანახმად, შეხვედრაზე შალვა თადუმაძემ ხაზი გაუსვა, თავდაცვის საფრთხის შემცირების სააგენტოს მიერ ორგანიზებულ მასშტაბურ, უწყებათაშორის საველე პრაქტიკულ სწავლებას „NEXUS Georgia 2026“, რომელიც მიზნად ისახავდა ქიმიური, ბიოლოგიური, რადიაციული და ბირთვული ინციდენტების დროს, ტაქტიკურ და ოპერატიულ დონეზე უწყებათაშორისი მზადყოფნისა და კოორდინაციის მიმართულებით სხვადასხვა უწყების შესაძლებლობების დემონსტრირებასა და შინაგან საქმეთა სამინისტროს რეაგირების მექანიზმების შემდგომ გაძლიერებას.

ცნობისთვის, აშშ-ის თავდაცვის საფრთხის შემცირების სააგენტომ (DTRA) და ქართველმა პარტნიორებმა საველე-პრაქტიკული სწავლება „NEXUS Georgia 2026“ ჩაატარეს, რომლის მიზანიც იყო საქართველოს შესაძლებლობების გაძლიერება ქიმიურ და ბიოლოგიურ საგანგებო სიტუაციებზე რეაგირების კუთხით.