ოცნების დეპუტატი ლევან მაჭავარიანი "ფორმულას" ჟურნალისტის, ვახო სანაიას დაკავებას გამოეხმაურა. მისი თქმით, "ნუ აყენებენ შეურაცხყოფას სხვას, ნუ ლანძღავენ, ნუ ლახავენ ღირსებას სხვა ადამიანებს და პატივი სცენ სახელმწიფო ინსტიტუტებს და ყველაფერი იქნება კარგად".

"თუ ჩვენ ფართო კონტექსტში არ შევხედავთ, მაშინ, რა თქმა უნდა, ესეთი ჰედლაინი იქნება ხმაურიანი, რომ ადამიანმა პოსტი დაწერა და 14 დღით სასჯელაღსრულების დაწესებულებაში ამოყო თავი.

ფართო კონტექსტში თუ შევხედავთ, მე რამდენადაც ვიცი, განმეორებითი იყო ეს ყველაფერი. ისიც ვიცი, რომ მას ჯარიმა არ გადაუხდია, ანუ სრული უპასუხისმგებლობა, უპატივცემულობა, ასე ვთქვათ, გამოავლინა, უწყებების მიმართ.

ადამიანი, როდესაც ასეთ უპატივცემულობას იჩენს ხოლმე კონკრეტული უწყებების, ინსტიტუტების მიმართ, რომ განმეორებით ჩადის იგივე დანაშაულს, არ იხდის იმ ჯარიმას, რომელიც აქვს დაკისრებული და საერთოდ არ აინტერესებს სასამართლო რა განაჩენს გამოიტანს, მოსამართლეს სხვა გზა აღარ რჩება და უნდა იყოს სასჯელი უკვე სასჯელაღსრულების დაწესებულება, რომელიც 14 დღე არის, თუ არ ვცდები და რაღაცნაირად გადაიტანს ბატონი სანაია.

ნუ აყენებენ შეურაცხყოფას სხვაs, ნუ ლანძღავენ, ნუ ლახავენ ღირსებას სხვა ადამიანებს და პატივი სცენ სახელმწიფო ინსტიტუტებს და ყველაფერი იქნება კარგად.

ნუ გადაკეტავს 10 ადამიანი ტროტუარს და იძალადებს დანარჩენ მოქალაქეებზე, ნუ გადაკეტავს 100 ადამიანი ცენტრალურ გამზირს და იძალადებს ამითი ქალაქის დანარჩენ მოქალაქეებზე, ხომ? ყველაფერი ხომ ლოგიკურია ეხლა, მე რაც ჩამოვთვალე, ხომ? დავიცვათ წესრიგი, დავიცვათ კანონი და ყველაფერი კარგად იქნება", – განაცხადა ლევან მაჭავარაინმა.

ჟურნალისტ ვახო სანაიას სოციალურ ქსელში დაწერილი პოსტის გამო 14-დღიანი პატიმრობა დღეს შეუფარდეს. გადაწყვეტილება მოსამართლე ზვიად ცეკვავამ მიიღო. არც ვახო სანაია და არც მისი ადვოკატი პროცესს არ დასწრებიან.