აშშ-მა კვირას საღამოს ირანზე ახალი იერიში მიიტანა, რითაც ორ ქვეყანას შორის რამდენიმე დღის განმავლობაში მიმდინარე დარტყმების სერია გააგრძელა. ირანის სახელმწიფო მედიის ინფორმაციით, დარტყმების შედეგად სამხრეთ-დასავლეთ ირანში ერთი ადამიანი დაიღუპა, ხოლო ოთხი დაშავდა. ინფორმაციას BBC ავრცელებს.

აშშ-ის ახალი დარტყმებიდან რამდენიმე საათში, ირანის "ისლამური რევოლუციის გუშაგთა კორპუსმა" (IRGC) განაცხადა, რომ იერიში მიიტანა აშშ-ის სამხედრო ბაზებზე ქუვეითში, იორდანიასა და ბაჰრეინში.

ეს თავდასხმები, რომლებიც ეჭვქვეშ აყენებს ივნისში ხელმოწერილი აშშ-ირანის დროებითი შეთანხმების მომავალს, იმ ურთიერთსაწინააღმდეგო განცხადებების ფონზე ხდება, რომლებიც ჰორმუზის სრუტის გახსნას ეხება. ირანი აცხადებს, რომ მან ეს საკვანძო გზა შემდგომ შეტყობინებამდე ჩაკეტა, ხოლო აშშ ამტკიცებს, რომ სრუტე ღიაა.

კვირას, 12 ივლისს, საღამოს აშშ-ის ცენტრალურმა სარდლობამ ირანზე დარტყმების მორიგი რაუნდი გამოაცხადა, რომელიც, მისი თქმით, აღმოსავლეთის დროით 17:00 საათზე დაიწყო. მოგვიანებით უწყებამ განაცხადა, რომ დარტყმები განხორციელდა ათობით ირანულ სამხედრო სამიზნეზე, მათ შორის საჰაერო თავდაცვის სისტემებზე, სანაპირო რადარის სადგურებზე, ასევე სარაკეტო და უპილოტო საფრენი აპარატების ინფრასტრუქტურაზე.

აშშ-ის ძალები "მზად იყვნენ უზრუნველეყოთ ნავიგაციის თავისუფლების შენარჩუნება კომერციული ნაოსნობისთვის, მიუხედავად ირანის მხრიდან გაგრძელებული გაუმართლებელი აგრესიისა, შევიწროებისა, მუქარისა და თვითნებური განცხადებებისა", — განაცხადა ცენტრალურმა სარდლობამ.

ცენტრალური სარდლობის პირველ განცხადებამდე რამდენიმე წუთით ადრე, ირანის სახელმწიფო ტელევიზიამ სირკში, ქეშმში, ბანდარ-აბასსა და ჯასკში აფეთქებების შესახებ გავრცელა ინფორმაცია.

"ორშაბათს დილით ამერიკელი მტრის თავდასხმის შედეგად... ერთი ადამიანი მოწამეობრივად დაიღუპა, ხოლო ოთხი სხვა დაშავდა", — იტყობინება სააგენტო IRNA ხუზესტანის პროვინციის უსაფრთხოებისა და სამართალდამცავი ორგანოების უფროსის მოადგილეზე, ვალიოლა ჰაიატიზე დაყრდნობით.