12 ივლისს ქალაქ თელავში მოსული უხვი ნალექის შედეგად მდინარე თელავის ხევმა კალაპოტი გაარღვია და ღვარცოფულმა ნაკადმა ქალაქის რამდენიმე ქუჩა დატბორა. გარემოს ეროვნული სააგენტოს პირველადი შეფასებით, ნალექების რაოდენობამ თელავის სადგურზე 57.3 მმ შეადგინა, რაც თელავისთვის თვის ნორმის 85%-ს შეადგენს, ხოლო იყალთოს სადგურზე 40.1 მმ.

მათ მიერ გავრცელებულ განცხადებაში ასევე ნათქვამია, რომ "ქალაქის ტერიტორიაზე, მდინარის კალაპოტმა ვერ უზრუნველყო ღვარცოფული ნაკადის სრული გატარება და გადავიდა მიმდებარე ტერიტორიაზე".

"პირველადი შეფასებით, თელავის მუნიციპალიტეტში მოსულმა უხვმა ატმოსფერულმა ნალექმა მდინარე თელავისხევის აუზში ღვარცოფული პროცესების მკვეთრი გააქტიურება გამოიწვია.

მყარი ნატანისა და წყლის კრიტიკული მასის ერთობლიობამ მძლავრი ღვარცოფული ნაკადი ჩამოაყალიბა. მდინარის შუა წელში განთავსებულმა სამმა ღვარცოფდამჭერმა (ე.წ. ხერხეულიძის ღვარცოფდამჭერი) ნაგებობამ ნაწილობრივ უზრუნველყო ნაკადის ფილტრაცია: პირველმა თითქმის სრულად შეაკავა მსხვილი ხე-ტყის მასალა, მეორემ — მცირე რაოდენობის ხე-ტყის ნატანი, ხოლო მესამემ –— ქვა-ღორღოვანი ფრაქცია. მიუხედავად ამისა, ნაკადის დიდმა მოცულობამ და ენერგიამ სამივე ნაგებობას მარცხენა მხრიდან გვერდი აუარა, დროებით კალაპოტად გამოიყენა ძველი გრუნტის გზა, დააზიანა ნაპირდამცავი ნაგებობები და გზის ცალკეულ მონაკვეთებზე გამოიწვია საფარის დეფორმაცია.

ქალაქის ტერიტორიაზე, მდინარის კალაპოტმა ვერ უზრუნველყო ღვარცოფული ნაკადის სრული გატარება და გადავიდა მიმდებარე ტერიტორიაზე. ღვარცოფული მასის ძირითადი აკუმულირება თელავის ქვედა ნაწილში, ცალკეული ინფრასტრუქტურული ობიექტების მიმდებარედ დაფიქსირდა", — წერია გარემოს ეროვნული სააგენტოს მიერ გავრცელებულ ინფორმაციაში.

მათივე ცნობით, გარემოს დაცვისა და სოფლის მეურნეობის მინისტრი დავით სონღულაშვილი, ინფრასტრუქტურის მინისტრ რევაზ სოხაძესთან ერთად, თელავში, სტიქიის ზონაში იმყოფებოდა და მიმდინარე სამუშაოები ადგილზე დაათვალიერა.

"მნიშვნელოვანია ის რეაგირება, რასაც სახელმწიფო აკეთებს. ყველა შესაბამისი სამინისტრო ჩართულია იმისთვის, რომ მაქსიმალურად მოკლე ვადაში იყოს ზიანი შეფასებული და აღმოფხვრილი. აქტიურად მიმდინარეობს ინფრასტრუქტურული სამუშაოები, აღდგენითი ღონისძიებები. მდგომარეობის შესაფასებლად, დილიდან ადგილზე მუშაობს გარემოს ეროვნული სააგენტოს გეოლოგებისა და ჰიდროლოგების ჯგუფი და სწავლობენ შექმნილ მდგომარეობას", —განაცხადა დავით სონღულაშვილმა.

12 ივლისს, ძლიერმა სტიქიამ თელავი დააზარალა. ადიდდა თელავის ხევი, რის შედეგადაც დაიტბორა ქუჩები და განადგურდა ინფრასტრუქტურა.