მოსამართლე რომეო ტყეშელაშვილმა 4 ოქტომბრის საქმეზე დაკავებული 8 პირი დამნაშავედ ცნო:

ალექსანდრე ჩილაჩავას მიესაჯა პატიმრობა 5 წლით;
ზურაბ ჭავჭანიძეს — 5 წლით;
გენადი კუპრეიშვილს — 5 წლით;
ვლადიმერ გველესიანს — 5 წლით;
ამირან დოლიშვილს — 5 წლით;
რამაზ მამულაძეს — 5 წლით;
სულხან ტუღუშს — 5 წლით;
ანტონ ვარდანიძეს — 5 წლით.

განაჩენის გამოცხადებამდე მოსამართლე რომეო ტყეშელაშვილმა ბრალდებულებს მიმართა, რომ "აქ არავის ასამართლებენ პატიოსნება-უპატიოსნებაზე" და მისი მტკიცებით "პოლიციის არაერთი თანამშრომელია დაჭრილი. იქნებ ახლა მაინც განასხვაოთ, რა არის შავი და რა არის თეთრი".

"ბრალდებულები აცხადებდნენ, თითქოს, ადგილი ჰქონდა პროვოკაციას, თუმცა, მტკიცებულებების გამოკვლევის დროს ეს არ გამოკვეთილა.

ვიდეომტკიცებულებების გამოკვლევისას ვნახეთ, რომ მშვიდობიან აქციაზე გარკვეული განცხადებები გაკეთდა სწორედ იმ ადამიანების მხრიდან, რომელთა მოწოდების საფუძველზე იქ გადაინაცვლეთ. მოგიწოდეს რა — პრეზიდენტის სასახლესთან გადაგენაცვლათ და მამაკაცური ძალებით განგეხორციელებინათ ის ქმედებები, რაც ვიდეოჩანაწერებში ვნახეთ.
აქ არავის ასამართლებენ პატიოსნება-უპატიოსნებაზე, ყველანი პატიოსნები ხართ, აქ განვიხილავთ იმას, დაადასტურა თუ არა ბრალდებამ დანაშაულის ნიშნები.
მშვიდობიანი აქცია იყო თავისუფლების მოედანზე და არც ერთი თქვენგანი იქ არ დაუკავებია პოლიციას. მას შემდეგ, რაც აქციას შეუერთდით ათონელის სასახლესთან, ძალადობა განხორციელდა.

პოლიციის არაერთი თანამშრომელია დაჭრილი. იქნებ ახლა მაინც განასხვაოთ, რა არის შავი და რა არის თეთრი.

პრეზიდენტის სასახლე სტრატეგიული ობიექტია და არავის აქვს უფლება, თუ საშვი არ აქვს, გადაინაცვლოს მის ეზოში . ზოგიერთი თქვენგანი წინა ხაზზე იყავით და დაცვის სამსახური იგერიებდა მოძალადე ჯგუფს. არაერთხელ მოხდა შესვლა, ღობე არ ყოფილა დამაბრკოლებელი. ღობე რომც არ ყოფილიყო, იქ არავის ჰქონდა შესვლის უფლება.
ვიდეოჩანაწერებში ვნახეთ, რომ გადაღებასაც უშლიდნენ აქციის მონაწილეები და ამბობდნენ, რომ ნუ ახდენდნენ გადაღებას. ბრალდების მხარემ ბრალდების დადასტურება მოახერხა 8-ვე ბრალდებულზე," — განაცხადა ტყეშელაშვილმა.

სასამართლო სხდომაზე ცნობილი გახდა, რომ ჭავჭანიძემ პროკურატურას საპროცესო შეთანხმების გაფორმების თხოვნით მიმართა, თუმცა ჭავჭანიძე არ იყო იმ პირებს შორის, რომელთაც საპროცესო შეთანხმების ფარგლებში გათავისუფლდნენ.

"არც ერთი არ ვართ ბოროტმოქმედები. შეგვარჩიეს პატიოსანი ხალხი, რომლებსაც არანარი დანაშაული არ გვაქვს, მოვხვდით უადგილო, უდროო სიტუაციაში. 4 ოქტომბრის აქციამდე ერთ თვეზე მეტი მიდიოდა ანონსი. ყველა ჯერზე ნათქვამი იყო, რომ მშვიდობიანი აქცია უნდა ყოფილიყო. მე არ ვიცი, რა მოხდა, რატომ მოხდა. მშვიდობიან აქციაზე ვიყავით მისული სუყველა. ყოველთვის იყო ნათქვამი, რომ იქნებოდა მშვიდობიანი აქცია. ვართ ყველანი უდანაშაულო ხალხი. [...]

ყველამ მაპატიეთ, მაგრამ მე თხოვნა გავგზავნე საპროცესო გარიგებაზე. ყველაზე დიდი ფასი ჩემთვის მართლა თავისუფლება ყოფილა. ჩემი მეუღლე აქ ვერც მოდის. ცხოვრებაში მის თვალებზე ცრემლი არ დამინახავს, მაგრამ ბოლოს რომ ველაპარაკე, ცრემლებს ვგრძნობდი," — განაცხადა ჭავჭანიძემ. (წყარო "პუბლიკა")

ტყეშელაშვილმა ჭავჭანიძეს უპასუხა, რომ "თუ ვინმეს სურდა საპროცესო შეთანხმების გაფორმება, ასეთი შუამდგომლობები განიხილა კოლეგა მოსამართლემ... ვისაც სურდა [საპროცესო], ამის თაობაზე ორივე მხარემ მიაღწია კონსესუსს და გარკვეული შედეგით დასრულდა ვისაც ინტერესი, სურვილი და მზაობა ჰქონდა".

სასამართლო პროცესის დასრულების შემდეგ ჭავჭანიძის განცხადებას საქმის პროკურორი თამარ იაკობიძეც გამოეხმაურა.

"ბრალდების მხარე არაერთხელ აცხადებდა, რომ საპროცესო შეთანხმებაზე მოლაპარაკებების წარმოება იმ პირებთან განხორციელდებოდა, რომლებიც ჩადენილ დანაშაულს აღიარებდნენ. ვინაიდან თავისი არსით საპროცესო შეთანხმება მოიცავს იმას, რომ პირი ჩადენილ დანაშაულს აღიარებს, ინანიებს. ამ შემთხვევაში, ზურაბ ჭავჭანიძეს არც განცხადებაში და არც სასამართლოში წარმოდგენილ პოზიციაში მისი მხრიდან ბრალად წარდგენილი ქმედების აღიარება არ განუხორციელებია. შესაბამისად, ამ მოცემულობით ბრალდების მხარე საპროცესო შეთანხმებას არ აფორმებს. ზურაბ ჭავჭანიძემ თავად გააჟღერა პროცესზე, რომ პროკურატურაში საპროცესო შეთანხმებაზე განცხადება აქვს გაგზავნილი, თუმცა, მისი მხრიდან აღნიშნულ განცხადებაში მხოლოდ და მხოლოდ მითითება იყო, რომ ბრალდების მხარეს მასთან საპროცესო შეთანხმება გაეფორმებინა," — განაცხადა პროკურორმა.

შეგახსენებთ, 14-პირიან საქმეში საპროცესო შეთანხმება გააფორმეს — ხვიჩა გოგოხიამ, გიორგი ქორქიამ, ლევან ჯიქიამ, გიორგი რურუამ, ლაშა ივანაძემ და სერგო მეგრელიშვილმა.

საპროცესო შეთანხმება 3-წლიან პირობით მსჯავრს და "დანაშაულის აღიარებას და მონანიებას" გულისხმობს.