ვიცეპრემიერმა და სახელმწიფო მინისტრმა სამართალდამცავი ორგანოების კოორდინაციის საკითხებში, მამუკა მდინარაძემ, სვეტიცხოვლის საკათედრო ტაძრიდან გამოსვლის შემდეგ, პატრიარქის შესაძლო თხოვნის შემთხვევაში პატიმართა შეწყალების თემაზე გააკეთა კომენტარი. მან ხაზგასმით აღნიშნა, რომ გადაწყვეტილება მხოლოდ მიხეილ ყაველაშვილის კომპეტენციაა და მასზე ზემოქმედება, თუნდაც რეკომენდაციის სახით, მართებული არ არის.

მდინარაძემ ასევე ისაუბრა დანაშაულის მონანიების მნიშვნელობაზე და აღნიშნა, რომ სახელმწიფოსა და ოპოზიციურად განწყობილ მხარეებს შორის ამ საკითხზე "ანტაგონისტური აზრებია".

"უნდა განვსაზღვროთ როგორია მეორე მხრიდან დამოკიდებულება. ეს არ არის ქართული ოცნების განსასაზღვრი საკითხი. სადაც პრეზიდენტის დისკრეციული უფლება არსებობს, მას რეკომენდაციაც კი შეიძლება ეზედმეტოს და ეს ბუნებრივი ამბავი იქნება და ეს არ შეიძლება, მაგრამ თუ პოზიციას ზოგადს მეკითხებით, კიდევ ერთხელ ვიმეორებ, 5-6 წლის წინ სინდისის პატიმარი რომ დაეძახათ მთელ მსოფლიოში ვიღაცისთვის, უნდა ყოფილიყო განსაკუთრებული უკანონობის მსხვერპლი. ჩემი პოზიცია სხვაა, თქვენი სხვაა.

ჩემი პოზიციაა, რომ როდესაც ადამიანი ინანიებს, შეიძლება შაბლონურადაც კი ჩანდეს, მაშინ სახელმწიფო მის მიმართ დათმობილი და ლმობიერია. ეს არ გამოდგება, რადგან ანტაგონისტური აზრებია თქვენსა და ჩემს შორის... ამის გაკეთება არ შეიძლება, არც მათ მოსთხოვოთ რამე, არც პრეზიდენტს მოსთხოვოთ რამე... თქვენ ამბობთ, რომ ის არ არის დამნაშავე. ბუნებრივია, სახელმწიფოს წარმომადგენლის მხრიდან ის ყოველთვის დამნაშავე იქნება, ვინც კი აღიარებს ჩადენილ დანაშაულს. უკვე ამ პოლიტიკაში შესვლაც კი არასწორია გადაწყვეტილების მიღების დროს.

დანარჩენი არის ერთი ადამიანი დისკრეციული უფლება. არ შეიძლება ოდნავ პოზიტიურ ან ნეგატიურ კონტექსტში მე ამაზე ვილაპარაკო. ჩემი პირადი მოლოდინზე არ შეიძლება ვილაპარაკოთ", — განაცხადა მამუკა მდინარაძემ.

მდინარაძის თქმით, პოლიტიკურ ჭრილში ამ საკითხის განხილვა გადაწყვეტილების მიღების პროცესისთვის ხელისშემშლელია და საბოლოო სიტყვა მხოლოდ ქვეყნის პრეზიდენტს ეკუთვნის.