კინოგაქირავების სფეროს წარმომადგენლების აღფრთოვანებას საზღვარი არ ჰქონდა, როდესაც Disney-მ CinemaCon-ზე, სტუდიის პრეზენტაციის ფარგლებში, შურისმაძიებლები: განკითხვის დღის (Avengers: Doomsday) პირველი სრულმეტრაჟიანი ტრეილერი წარადგინა. აქამდე Marvel მხოლოდ ოთხი მოკლე ტიზერით შემოიფარგლებოდა, რომლებიც სტივ როჯერსზე, თორზე, იქს-ადამიანებსა და ფანტასტიკურ ოთხეულზე იყო ფოკუსირებული. მიუხედავად იმისა, რომ ტრეილერის ექსკლუზიური ჩვენება ჯერჯერობით მხოლოდ CinemaCon-ის სტუმრებისთვის შედგა, ფანები მთელი მსოფლიოდან მოუთმენლად ელიან მის საჯაროდ გამოქვეყნებას.

Variety და სხვა გამოცემები წერენ, რომ ვიდეო იწყება რობერტ დაუნი უმცროსის პერსონაჟით: მწვანე კაპიუშონიანი და რკინისნიღბიანი დოქტორ დუმით, რომელიც მულტისამყაროში შეჭრისთვის ემზადება. ვხედავთ პროფესორ X-ს (პატრიკ სტიუარტი), რომელიც X-Mansion-ის ფანჯრიდან იყურება, სადაც კაშკაშა სინათლე დიდ საფრთხეზე მიანიშნებს. აქედან კი იწყება ნამდვილი "ქროსოვერების" კასკადი:

გამბიტი (ჩენინგ ტატუმი) და შანგ-ჩი (სიმუ ლიუ) ერთმანეთს ებრძვიან. მისტიკი (რებეკა რომინი) იღებს ელენა ბელოვას ფორმას, რაც ფლორენს პიუსა და ფლორენს პიუს შორის ორთაბრძოლით სრულდება. თორი (კრის ჰემსვორთი) და დუმი პირისპირ დგებიან, თუმცა დუმი თორის ჯადოსნურ ჩაქუჩს შიშველი ხელებით იჭერს. ყველაზე ემოციური მომენტი კრის ევანსის სტივ როჯერსის ტრიუმფალური დაბრუნება და თორთან შეხვედრაა. ასგარდელი შოკირებულია, რადგან Endgame-ში კაპიტანმა წარსულში პეგი კარტერთან დარჩენა აირჩია (და ფარი სემ უილსონს გადასცა). ჯერჯერობით გაურკვეველია, როგორ დაბრუნდა კაპიტანი, მაგრამ ფაქტია, რომ ის კვლავ "ღირსია" მოიმარჯვოს თორის ჩაქუჩი ისევე, როგორც თანოსთან ბრძოლისას.

განკითხვის დღე აერთიანებს შურისმაძიებლებს, იქს-ადამიანებს, ფანტასტიკურ ოთხეულსა და მეხთამფრქვევებს. მას შემდეგ, რაც ფანტასტიკური ოთხეულის ხომალდი MCU-ში მეხთამფრქვევების პოსტ-კრედიტ სცენაში გამოჩნდა, ახლა უკვე ვხედავთ მათ შეხვედრას ახალ შურისმაძიებლებთან (ბაკი ბარნსი, ელენა ბელოვა, სენტრი, გოსტი, წითელი გუშაგები და აშშ-ის აგენტი). ასევე ნაჩვენებია დაძაბული დაპირისპირება ვაკანდასა და ნამორის წყალქვეშა ტალოკანელებს შორის.

რობერტ დაუნი უმცროსი, რომელიც ტრეილერს აღმოსავლეთევროპული აქცენტით ახმოვანებს, სცენაზე კრის ევანსთან ერთად გამოვიდა. ფილმის რეჟისორები კვლავ ძმები რუსოები არიან, რომლებიც 2027 წელს შურისმაძიებლები: საიდუმლო ომებსაც გადაიღებენ.

შურისმაძიებლები: განკითხვის დღე ეკრანებზე 2026 წლის 18 დეკემბერს გამოვა, ზუსტად იმავე დღეს, როდესაც დენი ვილნევის დიუნი: ნაწილი მესამე.

მსგავსი ამბები:

• კრისტოფერ ნოლანის თქმით, ოდისეის გადაღებები "ნამდვილი კოშმარი იყო, თუმცა საჭირო"
• დიუნის მესამე ნაწილში მოქმედება 17 წლის შემდეგ ვითარდება — ფილმი CinemaCon-ზე წარადგინეს
• LOTR: ნადირობა გოლუმზე — იან მაკკელენი და ელაიჯა ვუდი როლებს უბრუნდებიან
• Ocean’s 11-ის პრიქველი დენი ოუშენის მშობლების შესახებ მოგვითხრობს