დისნეისა და ჯეიმს კამერონის წინააღმდეგ 3D ანიმატორმა, ერიკ რაიდერმა, კალიფორნიის ფედერალურ სასამართლოში სარჩელი შეიტანა. ანიმატორი ამტკიცებს, რომ კამერონმა მისი ნამუშევარი მიითვისა და 2022 წლის ფილმში Avatar: The Way of Water (ავატარი: წყლის გზა) გამოიყენა.

ერიკ რაიდერის სარჩელში ნათქვამია, რომ მან ჯეიმს კამერონის კომპანიასთან, Lightstorm Entertainment-თან, 1990-იანი წლების ბოლოს ითანამშრომლა. ამ თანამშრომლობის მიზანი კი ერიკის მიერ შექმნილი სამეცნიერო ფანტასტიკის ჟანრის მოთხრობის — KRZ-ის მიხედვით ფილმის გადაღება იყო. სარჩელში ნათქვამია, რომ კამერონმა Avatar-ის სერიებში რაიდერის სიუჟეტური ელემენტები გადაიტანა.

ავატარის მესამე ფილმის, სახელად Avatar:Fire and Ash-ის, პრემიერა 19 დეკემბერს შედგება. რაიდერი მინიმუმ 500 მილიონი დოლარის ოდენობის კომპენსაციას ითხოვს და ასევე სასამართლოს გადაწყვეტილებას, რომლის შედეგადაც ახალი ფილმის პრემიერა არ შედგება.

რაიდერმა მსგავსი სარჩელი უკვე შეიტანა Avatar-ის პირველი ფილმის წინააღმდეგ 2011 წელს. კალიფორნიის შტატის სასამართლომ ეს საქმე მას შემდეგ დახურა, რაც დაადგინა, რომ კამერონმა Avatar შექმნა მანამდე, სანამ რაიდერი თავის მოთხრობას Lightstorm-ს წარუდგენდა.

ახალ სარჩელში ნათქვამია, რომ ეს საქმე არ წარმოადგენს წინა მოთხოვნების ხელახალი განხილვის მცდელობას. არამედ, საქმე ეხება სიუჟეტის მითვისების ახალ ფაქტებს, რომლებიც Avatar-ის მეორე ნაწილში გამოვლინდა. დისნეისა და Lightstorm-ის წარმომადგენლებს სარჩელთან დაკავშირებით ჯერ კომენტარი არ გაუკეთებიათ.