აჰმედ ჩატაევისა და მისი დაჯგუფების წინააღმდეგ 2017 წელს დაწყებული გამოძიების ფარგლებში, სუს-მა თელავის მუნიციპალიტეტის სოფელ ლეჩურის მიმდებარედ არსებულ ტყის მასივში მოწყობილ სამალავში ცეცხლსასროლი იარაღი აღმოაჩინა. ინფორმაციას სუს-ი ავრცელებს.

"ჩატაევისა და მისი დაჯგუფების წინააღმდეგ 2017 წელს დაწყებული გამოძიების ფარგლებში, სუს-ის კონტრტერორისტულ ცენტრში მიღებულ იქნა ოპერატიული ინფორმაცია იმის შესახებ, რომ დაჯგუფების კუთვნილი საბრძოლო მასალის ნაწილი, მათი განეიტრალების შემდეგ, წლების განმავლობაში, ინახებოდა წყაროს მიერ მითითებულ ადგილას, რის შემდეგაც კონტრტერორისტული ცენტრის თანამშრომლების მიერ, თელავის მუნიციპალიტეტის სოფელ ლეჩურის მიმდებარედ არსებულ ტყის მასივში მოწყობილ სამალავში აღმოჩენილია ცეცხლსასროლი იარაღი, 5 მჭიდი, 161 ცალი ვაზნა, 3 ხელყუმბარა, სხვადასხვა სახის ასაფეთქებელი ნივთიერება, მათ შორის — ტროტილი. ასევე პირველადი დახმარების სამედიცინო ნივთები.

გამოძიება სისხლის სამართლის კოდექსის 323-ე, 331-ე პრიმა, 344-ე, 328-ე და 236-ე მუხლებით მიმდინარეობს", — წერია გავრცელებულ ინფორმაციაში.

შეგახსენებთ, რომ აჰმედ ჩატაევი "ისლამური სახელმწიფოს" ერთ-ერთი უფროსი სამხედრო მეთაური და ლიდერი იყო. მეთაურობდა "ისლამური სახელმწიფოს" ტერორისტული დაჯგუფების "იარმუკის" რაზმს. მეორე ჩეჩნეთის ომის დროს ჩატაევი ჩეჩნეთის იჩქერიის რესპუბლიკის შეიარაღებული ძალების ვედენოს სექტორში იბრძოდა. 2000-იან წლებში ის საზღვარგარეთ ემიგრაციაში წავიდა, სადაც ლტოლვილის სტატუსი მიიღო. 2015 წელს იგი გაეროს უცხოელი ტერორისტების სიაში შეიყვანეს.

სუსმა 2017 წლის 1-ელ დეკემბერს დაადასტურა ვარაუდი, რომ 21-22 ნოემბერს, ბერ გაბრიელ სალოსის გამზირზე ჩატარებული სპეცოპერაციის დროს ლიკვიდირებულ პირებს შორის ერთ-ერთი აჰმედ ჩატაევი იყო.