ცნობილმა გერმანელმა კომპოზიტორმა ჰანს ციმერმა ინსტაგრამგვერდზე პალესტინის მხარდასაჭერი განცხადება გაავრცელა, მოგვიანებით კი პოსტი წაშალა.

ორგზის ოსკაროსან მუსიკოსს გაზიარებული ჰქონდა ინტერნეტმომხმარებელ ილინ მორისონის პოსტი, რომელიც გლასტონბერის მუსიკალურ ფესტივალზე მომხდარ ამბავს ეხმაურებოდა. ინგლისურმა პანკ-რეპ დუეტმა Bob Vylan-მა ფესტივალზე გამოსვლისას დაიძახა "სიკვდილი, სიკვდილი IDF-ს (ისრაელის თავდაცვის ძალებს)", რასაც მედიაში დიდი გამოხმაურება მოჰყვა. პოსტი კი, რომელიც ციმერს ჰქონდა გაზიარებული, სწორედ მედიას მიემართებოდა:

"[მოსაყოლი] ამბავი პალესტინაა და არა გლასტონბერი. მასობრივი შიმშილობაა ამბავი და არა გლასტონბერი. ამბავია ისრაელის საოკუპაციო ძალების წევრების აღიარება, რომ გამიზნულად ესროდნენ მშვიდობიან მოქალაქეებს, რომლებიც არანაირ საფრთხეს არ წარმოადგენდნენ და მხოლოდ დახმარებას ითხოვდნენ. მოშიმშილე მოსახლეობისთვის განკუთვნილ ფქვილის ტომრებში რომ დამოკიდებულების გამომწვევ ოპიოიდებს ურევდნენ, ეგაა ამბავი და არა გლასტონბერი. ამბავია გენოციდი და არა გლასტონბერი. პალესტინაა ამბავი და არა გლასტონბერი".

ჰანს ციმერი, რომელიც წარმოშობით ებრაელია, იშვიათად აკეთებს პოლიტიკური შინაარსის განცხადებებს. მუსიკოსმა თავისი ებრაული იდენტობის შესახებ 1999 წლის ბერლინის კინოფესტივალზე გამოსვლისას ისაუბრა და აღნიშნა, რომ დედამისი მეორე მსოფლიო ომს გერმანიიდან ბრიტანეთში გაქცევით გადაურჩა, მისთვის კი საკმაოდ რთული იყო ომისშემდგომ გერმანიაში ბავშვობის გატარება.

ციმერს კულტურული კავშირები აქვს ახლო აღმოსავლეთთან. კომპოზიტორს უთანამშრომლია როგორც ისრაელის ფილარმონიულ ორკესტრთან, ასევე დასავლეთ სანაპიროზე (პალესტინის ტერიტორია), ბეთლემში, ანონიმურ არტისტ ბენკსის მიერ გახსნილ სასტუმროსთან.