დღეს ბრიუსელში ევროსაბჭოს საპარლამენტო ასამბლეის საზაფხულო სესია იწყება, სადაც საქართველოს საკითხსაც განიხილავენ.

დებატებს ასეთი სახელწოდება აქვს: "მოწოდება საქართველოში პოლიტიკურად მოტივირებული დევნის წინაშე მყოფი პირების დაუყოვნებლივ გათავისუფლებაზე".

ბრიუსელში ევროკავშირის საგარეო საქმეთა მინისტრების შეხვედრამდე, ლიეტუვის საგარეო საქმეთა მინისტრი, კიასტუტის ბუდრისი ჟურნალისტებს ესაუბრა. მან ევროსკოპთან განაცხადა, რომ შეხვედრაზე განიხილავენ საკითხებს საქართველოში "სამოქალაქო საზოგადოების დამატებითი მხარდაჭერიდან დაწყებული, საქართველოსთან არსებული სავიზო რეჟიმის გადახედვით დამთავრებული".

"დღისწესრიგის ამ ნაწილის პირველი საკითხი საქართველოა. ლიეტუვის ინიციატივის საფუძველზე გთავაზობთ 6 პუნქტს, თუ როგორ უნდა გაგრძელდეს მუშაობა საქართველოსთან დაკავშირებით. ეს იმ პირობებში როცა ვხედავთ, რომ ადამიანის უფლებების მიმართულებით მდგომარეობა მძიმდება. უკვე მოვამზადეთ შეთავაზებები. დღეს ჩემს კოლეგებთან ერთად განვიხილავთ, საკითხებს სამოქალაქო საზოგადოების დამატებითი მხარდაჭერიდან დაწყებული, საქართველოსთან არსებული სავიზო რეჟიმის გადახედვით დამთავრებული", — განაცხადა კიასტუტის ბუდრისმა.

საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის, კაია კალასის თქმით, საქართველოში სიტუაცია უარესდება. ამიტომ "კვლავ დააყენებ სანქციების საკითხს იმ ხალხის მიმართ, რომლებიც ჩადიან ძალადობას და არღვევენ ადამიანების უფლებებს საქართველოში".

"განვიხილავთ საქართველოსაც. სიტუაცია უარესდება. ისევ დავაყენებ სანქციების საკითხს იმ ხალხის მიმართ, რომლებიც ჩადიან ძალადობას და არღვევენ ადამიანების უფლებებს საქართველოში. განვიხილავთ კიდევ რისი გაკეთება შეიძლება, რადგან საქართველო არასწორ გზაზე დგას. დღეს დეტალურად არ განვიხილავთ ბერკეტებს, მაგრამ უვიზო რეჟიმის შეჩერება ერთ-ერთი ბერკეტია", — განაცხადა კალასმა.

ნიდერლანდების პირველი დიპლომატი კასპარ ვანდკამპი ევროსკოპის შეკითხვაზე საქართველოსთან დაკავშირებით აცხადებს, რომ "ნამდვილად ღელავენ ქართველ ხალხზე, რომლებსაც ასეთი მასშტაბით სურთ ევროპული მომავალი".

"ვერ გეტყვით კონკრეტულად რა საკითხებს განვიხილავთ. მაგრამ მოხარული, რომ დღის წესრიგში კვლავ არის საქართველო. ეს ძალიან მნიშვნელოვანია, რადგან ტენდენცია ძალიან უარყოფითია, ჩვენი შეშფოთება კი იზრდება. ნამდვილად ვღელავ ქართველ ხალხზე, რომლებსაც ასეთ მასშტაბით სურთ ევროპული მომავალი", — აცხადებს ვანდკამპი.

სტატიაში გამოყენებული ციტატების თარგმანი ეკუთვნის ფორმულას.