პრობლემური რეპუტაციის მქონე ამერიკელმა რეპერმა ქანიე უესთმა ახალი სიმღერა გამოუშვა, რომელიც მან თავის 11 წლის შვილთან, ნორთთან, და აშშ-ში დაკავებულ რეპერთან, შონ "დიდი" ქომბსთან, ერთად ჩაწერა.

სიმღერა, სახელწოდებით Lonely Roads Still Go to Sunshine, უესთმა X-ზე (ყოფილი ტვიტერი) გამოაქვეყნა. ნორთ უესთთან და ქომბსთან ერთად, ჩანაწერში "დიდის" შვილი და მუსიკოსი ჯასმინ უილიამსი მონაწილეობენ. კომპოზიცია კი ქანიესა და შონის სატელეფონო საუბრით იწყება.

"მადლობა მინდა გადაგიხადო, რომ ჩემს შვილებზე ზრუნავ", — ამბობს ქომბსი, — "მათ არავინ ეკონტაქტება, არც კი ურეკავენ".

"რა პრობლემაა, ძალიან მიყვარხარ, ძმაო", — პასუხობს უესთი, — "შენ მე გამზარდე".

ამერიკული ტაბლოიდის TMZ-ის ცნობით, უესთმა სიმღერის გამოქვეყნებამდე მისი და ნორთის დედის, ტელევარსკვლავ კიმ კარდაშიანის, მიმოწერის "სქრინები" გაასაჯაროვა და მოგვიანებით წაშალა. მიმოწერაში კარდაშიანი ყოფილ ქმარს ეუბნება, რომ ნორთის სახელი სავაჭრო ნიშნადაა რეგისტრირებული და მას "დიდის" სიმღერაში ვერ გამოიყენებს. კიმის თქმით, ეს თავისი უფროსი შვილის დასაცავად გააკეთა.

ტაბლოიდი ასევე წერს, რომ უესთი და კარდაშიანი შეთანხმებულები იყვნენ, თავიანთი ყველა შვილის სახელი სავაჭრო ნიშნად დაერეგისტრირებინათ, რათა ისინი სხვა არავის გამოეყენებინა.

"ან გამოასწორე ეგ ამბავი, ან ომს წამოვიწყებ, ამ ამბავს კი ვერც ერთი ჩვენგანი ვერ გადაურჩება", — პასუხობს უესთი კიმს მიმოწერაში, — "მოგიწევს, მომკლა".

შონ "დიდი" ქომბსი და ქანიე უესთი 2014 წელს

ფოტო: Kevin Mazur / Child2014 / WireImage

თავადაც არაერთ სკანდალში გახვეულმა უესთმა, სექსუალურ ძალადობასა და ტრეფიკინგში ბრალდებული შონ "დიდი" ქომბსი, რომელიც შარშან დააკავეს, წინათ საჯაროდაც დაიცვა და თქვა, რომ იგი უნდა გათავისუფლდეს.

უესთი კი, თავისი ბოლოდროინდელი ანტისემიტური, ჰომოფობიური და მიზოგინიური განცხადებების გამო, ისევ კრიტიკის ქარცეცხლშია გახვეული. რამდენიმე კვირის წინ, მან მაისურები გამოუშვა ნაცისტური სვასტიკის გამოსახულებით, რასაც არაერთი ცნობილი ადამიანი და ორგანიზაცია მწვავედ გამოეხმაურა. პრობლემური განცხადებების გამო, უესთთან მისმა აგენტმა და რამდენიმე ცნობილმა ბრენდმაც გაწყვიტეს თანამშრომლობა.