ვაშინგტონმა მოსკოვს მოთხოვნა გაუგზავნა რუსეთში აშშ-ის ელჩად რიჩარდ ნორლანდის დანიშვნაზე. ამის შესახებ რუსული მედია წერს.

კომერსანტის ინფორმაციით, ეს დანიშვნა აშშ-ის წინა პრეზიდენტის ჯო ბაიდენის ადმინისტრაციამ მოითხოვა, მოქმედმა ადმინისტრაციამ კი კანდიდატურა არ მოხსნა.

გამოცემა ასევე იუწყება, რომ რუსეთის ახალი ელჩი აშშ-ში შესაძლოა იყოს რუსეთის საგარეო საქმეთა სამინისტროს ჩრდილო-ატლანტიკური დეპარტამენტის დირექტორი და რუსეთის ყოფილი ელჩი კანადაში ალექსანდრე დარჩიევი. რუსეთის საგარეო საქმეთა სამინისტრომ მისი შესაძლო დანიშვნის შესახებ ნოემბერში გაავრცელა ინფორმაცია, მაგრამ დარჩიევი ამ თანამდებობაზე ოფიციალურად ჯერ არ დანიშნულა, რადგან ვაშინგტონმა ოფიციალური თანხმობა არ მისცა.

2023 წლიდან რუსეთში აშშ-ის ელჩის პოსტს ლინ ტრეისი იკავებს. ანატოლი ანტონოვი შეერთებულ შტატებში რუსეთის ელჩის თანამდებობას 2017 წლიდან ასრულებდა და თანამდებობა 2024 წლის ოქტომბერში დაასრულა.

რიჩარდ ნორლანდს აქვს ორმოც წელზე მეტი დიპლომატიური გამოცდილება. 1980-იან წლებში მუშაობდა აშშ-ის საელჩოებში ბაჰრეინში, ნორვეგიასა და სსრკ-ში.

1993 წელს ნორლანდი მსახურობდა აშშ-ს წარმომადგენლად და მისიის უფროსის მოვალეობის შემსრულებლად საქართველოში ეუთოს მისიაში.

2000-იან წლებში ნორლანდი იყო მისიის უფროსის მოადგილე ავღანეთში და ელჩი უზბეკეთში. 2010-იან წლებში — აშშ-ის ელჩი საქართველოში, 2020-იან წლებში კი აშშ-ს ელჩი ლიბიაში. ფლობს რუსულ, ფრანგულ, ნორვეგიულ და ლატვიურ ენებს.