ჯო ბაიდენის ადმინისტრაცია უახლოეს დღეებში რუსეთისათვის სანქციების ახალი პაკეტის დაწესებას გეგმავს — სანქციების სამიზნე ე.წ "ჩრდილოვანი ფლოტი" იქნება — ტანკერები, რომელთაც რუსული ნავთობი გადააქვთ. ამის შესახებ საინფორმაციო სააგენტო Reuters წერს.

როიტერსის ცნობით, სანქციების ახალი პაკეტი საკმაოდ ვრცელი იქნება და შესაბამის სიაში ნავთობის ორი რუსული კომპანია, 100-ზე მეტი ტანკერი, რუსული სადაზღვეო კომპანიები და ნავთობის გადამყიდველები მოხვდებიან. სანქციები შეეხებათ იმ ინდივიდებსაც, რომლებიც დაკავშირებულები არიან ნავთობის G7-ის მიერ დაწესებულ ფასზე ძვირად გაყიდვასთან.

სწორედ ამ შეზღუდვებისათვის გვერდის ასავლელად იყენებს რუსეთი "ჩრდილოვან ფლოტს", რომელიც სხვა ქვეყნების დროშების ქვეშ მცურავი მოძველებული ტანკერებისგან შედგება. ექსპერტების მტკიცებით, ამ გემებიდან თითოეული შეიცავს მნიშვნელოვან რისკებს ეკოლოგიისათვის. ერთ-ერთი ასეთი ტანკერი ცოტა ხნის წინ ფინეთის ყურეში დააკავეს — გემს, რომლის კაპიტანი და ეკიპაჟის ნაწილი ქართველები არიან, ბრალად ედება ფინეთის ყურეში მოწყობილი დივერსია, რომლის შედეგადაც წყალქვეშა კაბელები დაზიანდა.

ინფორმაციას, ფაქტობრივად, ადასტურებს სერბეთის პრეზიდენტი ალექსანდრ ვუიჩიჩიც, რომელიც ირწმუნება, რომ აშშ-ის სანქციების პაკეტში სერბეთის ნავთობის ინდუსტრიაც მოხვდება, რადგან მისი 50%-ზე მეტი რუსულ კომპანიებს ეკუთვნის.