ანა ლომთაძემ სახელმწიფო ზრუნვისა და ტრეფიკინგის მსხვერპლთა და დაზარალებულთა დახმარების სააგენტო პროტესტის ნიშნად დატოვა. ამის შესახებ ის სოციალურ ქსელში წერს და სამსახურიდან გათავისუფლების წერილს აქვეყნებს.

"საერთოდ არ ვაპირებ, არასდროს, ავტორიტარულ რეჟიმს შევეგუო.

ვფიქრობ, პირველი რაც ადამიანმა უნდა შეძლო, არის გულგრილად არ უყურო როცა შენ გვერდით მეორე ადამიანს უსამართლოდ ექცევიან.

ამას არაფერი ამართლებს, წერტილი.

ისე, გლობალური ომის პარტია ვერ მაშინებს. საშიში ისაა, როცა ბოდვების დაჯერებას იწყებ. ფიქრობ, რომ ფსიქოპათების ტვინებიდან უწყვეტ ნაკადად გადმოდენილი სისულელე შენ არ დაგსვრის.

სახელმწიფო და ყველა სახელმწიფო სისტემა უნდა ემსახურებოდეს ადამიანების კეთილდღეობას და არა ძალადობრივი ჯგუფების ვიწრო ინტერესებს", — წერს ანა ლომთაძე სოციალურ ქსელში.

ანა ლომთაძემ აღნიშნულ სააგენტოში ქალაქ თბილისის საქალაქო ცენტის ბავშვზე ზრუნვისა და დაცვის განყოფილების სპეციალური მუშაკის პოზიცია ეკავა. ის გაცხადებაში წერს:

"სოციალური მუშაკის საქმე პირდაპირ უკავშირდება ადამიანთ უფლებების დაცვას. ქვეყანაში მიმდინარე მოვლენების ფონზე, სადაც სახელმწიფო წარმომადგენლები ძალადობრივი მეთოდებით უსწორდებიან საკუთარ მოქალაქეებს ფიზიკური ანგარიშსწორების, დაშინების, შანტაჟისა და წამების გზით. მიმდინარეობს დემოკრატიული სისტემის რღვევა და ქართული სახელმწიფო რჩება ძალადობრივი ჯგუფის მმართველობის ქვეშ.

აღნიშნული გარემოება ეწინააღმდეგება ჩემს პიროვნულ

პრინციპებს და ღირებულებებს. ...ვუერთდები ქვეყანაში მიმდინარე პროტესტს და მიმდინარე წლის 23 დეკემბრიდან გთხოვთ გამათავისუფლოთ დაკავებული პოზიციიდან", — წერს ანა ლომთაძე განცხადებაში, რომლის ადრესატიც ამავე სააგენტოს დირექტორი რუსუდან კოხოძეა.