"პირადობის მოწმობების ჩამორთმევის შესახებ არსებული ინფორმაცია აჩენს დასაბუთებულ ეჭვს, რომ მისი მიზანი სხვა პირების მიერ არჩევნებში მონაწილეობის გზით არჩევნების გაყალბებაა", — ამის შესახებ სადამკვირვებლო მისია — ჩემი ხმის სპიკერმა, ლონდა თოლორაიამ დღეს გამართულ ბრიფინგზე განაცხადა.

სადამკვირვებლო მისია ჩემი ხმა წინასაარჩევნო პერიოდში გამოკვეთილ დარღვევებზე საუბრობს და შესაბამის უწყებებს გავრცელებული ცნობების გამოძიებისკენ მოუწოდებს. როგორც ბრიფინგზე ლონდა თოლორაიამ განაცხადა,

"პრობლემად იკვეთება ამომრჩევლებისთვის პირადობის მოწმობების ჩამორთმევა. ასეთი ფაქტების შესახებ ჩვენს კოალიციასაც მომართა ათობით მოქალაქემ. ამ შემთხვევაშიც, მიუხედავად იმისა, რომ ვრცელდება ინფორმაცია პირადობის მოწმობების მუქარით, შანტაჟით ჩამორთმევისა და ამ პროცესში სამართალდამცავი ორგანოებისა და ასევე, სხვა საჯარო უწყებების ჩართულობის შესახებ, პასუხისმგებელი საგამოძიებო უწყებები არ აკეთებენ არავითარ განცხადებას ამ ფაქტებზე განხორციელებული რეაგირების შესახებ.

წინასაარჩევნო პერიოდში პირადობის მოწმობების ჩამორთმევას შეუძლებელია ჰქონდეს კეთილშობილური მიზნები. გავრცელებული ინფორმაცია აჩენს დასაბუთებულ ეჭვებს, რომ პირადობის მოწმობების ჩამორთმევის მიზანი არის არჩევნებში ნების განხორციელებისთვის ხელის შეშლა, ამომრჩევლის ნებაზე ზეგავლენა და ამომრჩევლის მოსყიდვისა და ჩამორთმეული პირადობის მოწმობების გამოყენებით სხვა პირების მიერ არჩევნებში მონაწილეობის გზით არჩევნების გაყალბება.

ყველა ეს დანაშაული, რაც ჩამოვთვალე, გახლავთ სპეციალური საგამოძიებო სამსახურისა და პროკურატურის საგამოძიებო ქვემდებარეობა. მოვუწოდებთ ორივე უწყებას, დაუყოვნებლივ დაიწყონ გამოძიება და ჩატარებული გამოძიების შესახებ აცნობონ საზოგადოებას", — აღნიშნა ლონდა თოლორაიამ.