ბაქოს ფრანგული ლიცეუმი (BFL) ფუნქციონირებას მიმდინარე სასწავლო წლის ბოლოდან შეწყვეტს.

ლიცეუმის განათლების მრჩეველმა, გულშან ნაღიზადემ OC Media-ს განუცხადა, რომ გადაწყვეტილება, ნაწილობრივ, განათლების სამინისტროს ბრძანებამ განაპირობა, ნაწილობრივ კი — სკოლის დამფუძნებლის გადაწყვეტილებამაც.

ინფორმაცია სკოლის დახურვის შესახებ პირველად პარასკევს გამოქვეყნდა პროსამთავრობო გამოცემა Report.az-ში.

გასულ კვირას, საფრანგეთმა გაიწვია თავისი ელჩი აზერბაიჯანში, პარიზმა ბაქო ორმხრივი ურთიერთობების დაზიანებაში დაადანაშაულა.

მზარდი დაძაბულობის ფონზე, სკოლის დახურვის შესახებ ინფორმაცია წინასწარ გავრცელდა, ეს ამბავი მხოლოდ პარასკევს დადასტურდა. მშობლებმა, გავრცელებული ინფორმაციით, მიიღეს წერილი სკოლის დახურვის შესახებ.

ლიცეუმი აზერბაიჯანში ფრანგულენოვან უცხოელ მოქალაქეებს, ასევე აზერბაიჯანის მოქალაქეებს საშუალებას აძლევდა, განათლება ფრანგულად მიეღოთ. სკოლის კურსდამთავრებულებს კი შეეძლოთ, სწავლა გაეგრძელებინათ საფრანგეთის უმაღლეს სასწავლებლებში.

განცხადებას ფრანგული საშუალო სკოლის აშენების შესახებ 2011 წლის მარტში მოაწერეს ხელი ჰეიდარ ალიევის ფონდმა, საფრანგეთის საელჩომ აზერბაიჯანში, აზერბაიჯანის სახელმწიფო ნავთობკომპანიამ და განათლების სამინისტრომ.

სამი წლის შემდეგ, პრეზიდენტმა ილჰამ ალიევმა და საფრანგეთის მაშინდელმა პრეზიდენტმა ფრანსუა ოლანდმა დაათვალიერეს სკოლის მშენებლობა, ალიევმა მიიღო მონაწილეობა სკოლის გახსნაშიც, 2014 წლის სექტემბერში.

Report.az-ის ცნობით, სკოლაში ამჟამად 200-მდე ბავშვი სწავლობს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.