აშშ-ის შტატ მერილენდში, ქალაქ ბალტიმორში, გემი "დალი" ხიდს შეეჯახა, რის შედეგადაც ნაგებობა ჩამოინგრა. სინგაპურის დროშის ქვეშ მცურავი, 289 მეტრი სიგრძის მქონე კონტეინერმზიდი შრი-ლანკისკენ მიემართებოდა, რა დროსაც მდინარე პატაპსკოზე გადებული ხიდის ერთ-ერთ საყრდენ ბურჯს დაეჯახა და ცეცხლი მოეკიდა. ბალტიმორის სამაშველო სამსახურის ცნობით, შეჯახებას მოყოლილი ჩამონგრევის შედეგად, წყალში 20-მდე ადამიანი და რამდენიმე მანქანა გადაცვივდა.

უბედური შემთხვევის ამსახველი ვიდეო ინტერნეტშიც გავრცელდა. მასში ჩანს, როგორ ეჯახება და ანგრევს გემი ფრენსის სკოტ ქის სახელობის ხიდს, რომლის სიგრძეც 2,6 კილომეტრს აღწევდა. ხიდის მშენებლობა 1972 წელს დაიწყო და ხუთ წელიწადს გაგრძელდა. ის აშშ-ის სახელმწიფო ჰიმნის ტექსტის ავტორის სახელს ატარებდა.

სამაშველო სამუშაოები, მყვინთავების ჩართულობით, ისევ გრძელდება. ამ დროისთვის ორი ადამიანია ნაპოვნი — მათ მძიმე დაზიანებები აღენიშნებათ.

დაშავებულთა და დაღუპულთა ზუსტი რიცხვი ჯერჯერობით უცნობია.

"ჩვენი მთავარი ამოცანა ახლა დაშავებულთა შველა და დაღუპულების ცხედრების პოვნაა", — აცხადებს სამაშველო სამსახურის წარმომადგენელი, კევინ კარტრაითი.

ფოტო: CBS News

სინგაპურის ცნობით, უბედური შემთხვევის მომენტში კონტეინერმზიდზე ეკიპაჟის 22 წევრი იმყოფებოდა. ამასთან, გემი 4 600-ზე მეტი კონტეინერით იყო დატვირთული. უცნობი რჩება ისიც, რამ გამოიწვია შეჯახება. ოფიციალური უწყებების განცხადებით, "არაფერი მიუთითებს იმაზე, რომ მომხდარი ტერორისტული აქტი ან გამიზნული ქმედება იყო".

///

"წარმოუდგენელი ტრაგედიაა. მძაფრსიუჟეტიანი ფილმის კადრები გეგონებოდა", — ამბობს ბალტიმორის მერი, ბრენდონ მ. სკოტი, მომხდარზე. მას ასევე ჰკითხეს, იგეგმება თუ არა გემის აღდგენა, მაგრამ მერმა განაცხადა, რომ ამ დროისთვის მთელი ყურადღება სამაშველო სამუშაოებზეა გადართული.

მერილენდის გუბერნატორმა კი შტატში საგანგებო მდგომარეობა გამოაცხადა და ბაიდენის ადმინისტრაციას ფედერალური ძალების დახმარება სთხოვა.

თავის მხრივ, მომხდარს გამოეხმაურა თეთრი სახლიც. აშშ-ის პრეზიდენტის ადმინისტრაციის ცნობით, ისინი კავშირზე არიან ადგილობრივ ხელისუფლებასთან და მოვლენების განვითარებას აქტიურად ადევნებენ თვალს. თეთრმა სახლმა უბედური შემთხვევის მსხვერპლების ახლობლებსაც გამოუცხადა თანადგომა.