საქართველოს საკონსტიტუციო სასამართლოს გადაწყვეტილებით, არასაკონსტიტუციურია საქართველოს კანონდმებლობაში არსებული ის ნორმა, რომელიც ჰომოსექსუალ კაცებს სისხლის დონაციის უფლების განუსაზღვრელი ვადით უზღუდავს. საკონსტიტიტუციო სასამართლოს გადაწყვეტილება 13 ივლისს გახდა ცნობილი.

გასაჩივრებული ნორმაში არ იყო გათვალისწინებული ე.წ. „ფანჯრის პერიოდი“, რომლის მიღმაც სისხლის გზით გადამდები დაავადებების აღმოჩენა სრულად შესაძლებელია და უფლებას ბლანკეტურად, განუსაზღვრელი ვადით ზღუდავდა. სასამართლომ გადაწყვეტილებაში მიუთითა, რომ სადავო ნორმა 2017 წლის პირველი ნოემბრიდან გაუქმდება, რადგან მიიჩნია, რომ სადავო ნორმის დაუყოვნებლივ გაუქმებას, შესაძლოა, საფრთხე შეექმნა სისხლისა და მისი კომპონენტების დონაციის უსაფრთხოებისათვის.

სარჩელი გოჩა გაბოძემ და ლევან ბერიანიძემ საქართველოს შრომის, ჯანმრთელობისა და სოციალური დაცვის მინისტრის წინააღმდეგ შეიტანეს. მოსარჩელეები მიიჩნევდნენ, რომ მათი თანასწორობის უფლება იზღუდებოდოდა, რადგან მათ სამუდამოდ ეკრძალეოდათ სისხლისა და მისი კომპონენტების დონორობა.

"დონორად ყოფნის უფლების აკრძალვით მათ ეზღუდებათ ინტიმური ცხოვრების ხელშეუვალობის უფლება, კერძოდ, არ შეუძლიათ დამოუკიდებლად განსაზღვრონ საკუთარი სექსუალური ორიენტაცია და სქესობრივი პრაქტიკა. ამგვარად, სარჩელის თანახმად, ილახება მათი პიროვნების თავისუფალი განვითარების უფლება," - ვკითხულობთ საკონსტიტუციო სასამართლოს პრესრელიზში.

მოსარჩელეები მიიჩნევენ, რომ მსგავს საკითხზე სასამართლომ უკვე იმსჯელა 2014 წლის 4 თებერვლის (#2/1/536) გადაწყვეტილებით საქმეზე „საქართველოს მოქალაქეები ლევან ასათიანი, ირაკლი ვაჭარაძე, ლევან ბერიანიძე, ბექა ბუჩაშვილი და გოჩა გაბოძე საქართველოს შრომის, ჯანმრთელობისა და სოციალური დაცვის მინისტრის წინააღმდეგ.