რა ხდება: ისრაელის თავდაცვის ძალების (IDF) ინფორმაციით, ღაზაში ჰამასის ლიდერის, ისმაილ ჰანიეს სახლი დაბომბეს.

  • მათი მტკიცებით, პოლიტიკური ბიუროს ხელმძღვანელის სახლი ტერორისტულ ინფრასტრუქტურად და ჰამასის ლიდერების შეხვედრის ადგილად გამოიყენებოდა.
  • IDF ავრცელებს ვიდეოჩანაწერებსაც, სადაც მათი ინფორმაციით, სწორედ ჰანიეს სახლის აფეთქება ჩანს.

ვინ არის ისმაილ ჰანიე: მას ჰამასის ყველაზე მნიშვნელოვან პირად მიიჩნევენ.

  • ჰანიე 1980-იანი წლებიდან ჰამასის ცნობილი წარმომადგენელი იყო, ის ისრაელში 3 წლის განმავლობაში იყო დაპატიმრებული, რის შემდეგაც 1 წელი გადასახლებაში გაატარა, მოგვიანებით კი ღაზაში დაბრუნდა.
  • 2006 წელს ის პალესტინის პრეზიდენტმა მაჰმუდ აბასმა პრემიერ-მინისტრად დანიშნა, თუმცა მას შემდეგ, რაც ჰამასმა აბასის პარტია ფათაჰი ღაზიდან ძალადობრივად გააძევა, პრეზიდენტმა მას თანამდებობა ჩამოართვა.
  • ჰანიემ მისი თანამდებობიდან გათავისუფლება არაკონსტიტუციურად მიიჩნია და განაცხადა, რომ ჰამასი "არ იტყოდა უარს, ეროვნულ პასუხისმგებლობაზე პალესტინელი ხალხის მიმართ" და განაგრძობდა მმართველობას ღაზაში.
  • ჰამასის პოლიტიკური ბიუროს ხელმძღვანელად ის 2017 წელს აირჩიეს.
  • 2018 წელს კი აშშ-მა ჰანიე ტერორისტად გამოაცხადა.
  • ბოლო რამდენიმე წლის განმავლობაში, ჰამასის ხელმძღვანელი კატარში ცხოვრობს.

მსგავსი თემა: ადამიანები, ადგილები და ტერმინები, რომლებიც ისრაელ-პალესტინის კონფლიქტში უკეთ გარკვევაში დაგვეხმარება