თუ გაცნობის აპლიკაციებში სავარაუდო პარტნიორს ვერ პოულობ და "ზარი ახლობელთან" გჭირდება ხოლმე, ტინდერი აპირებს, შენთვის ახალი ფუნქცია — Tinder Matchmaker — დაამატოს. ამ ფუნქციის დახმარებით მომხმარებელს უფლება ექნება, 24 საათის განმავლობაში ოჯახის წევრებსა და მეგობრებს პოტენციური პარტნიორების პროფილებზე მისცეს წვდომა. ამის შემდეგ ახლობლებს შეეძლებათ, სასურველ პროფილს რეკომენდაცია გაუწიონ.

ახალი ფუნქციით თავად აირჩევ, პოტენციური პარტნიორების პროფილები შესაფასებლად ვის გაუგზავნო. შემფასებლებს აპლიკაციაში შენი პოტენციური პარტნიორის არჩევა ან უარყოფა არ შეეძლებათ — მათი "უფლებები" მხოლოდ რეკომენდაციის გაცემით შემოიფარგლება.

აღსანიშნავია, რომ პოტენციური პარტნიორის პროფილის გაზიარება 15-მდე ადამიანთან შეგიძლია, მათ კი ამ ფუნქციის გამოსაყენებლად აპლიკაციაში პროფილის შექმნა არ სჭირდებათ. წყვილების ურთიერთობის ექსპერტი სარა ლუიზ რაიანი ფიქრობს, რომ ამ ფუნქციამ შეიძლება მომხმარებლებს დისკომფორტი შეუქმნას, რადგან ეცოდინებათ, რომ მათ პროფილს პოტენციური პარტნიორის გარდა ისეთი ადამიანებიც ხედავენ, რომლებიც აპლიკაციას თავიანთ ინფორმაციას არ აზიარებენ. ამის მიუხედავად, რაიანი თვლის, რომ ტინდერს მომხმარებელთა ინფორმაციის დაცვის კარგი ისტორია აქვს.

ტინდერის წარმომადგენლებმა BBC-ს განუცხადეს, რომ მომხმარებლებს თავად შეეძლებათ გადაწყვიტონ, უნდათ თუ არა Tinder Matchmaker-ში მონაწილეობა.

პირველ ეტაპზე ახალი ფუნქცია 15 ქვეყანაში დაემატება, შემდეგ კი Tinder Matchmaker-ზე წვდომა აპლიკაციის ყველა მომხმარებელს ექნება.