გაიგე, რომ ქათმების გაქცევა 20 წლის შემდეგ ბრუნდება? ან ის, The Rolling Stones ახალ ორიგინალურ ალბომს რომ უშვებს? ეს ორივე ამბავი გასულ კვირას შევიტყვეთ. ეს კვირა კი მართლაც დატვირთული იყო კულტურისა თუ პოპკულტურის სიახლეებით. და იმის მიუხედავად, რომ აქტიურად გვადევნებ თვალს, რომელიმე მათგანი მაინც შეიძლებოდა გამოგრჩენოდა. ამიტომ, გადავწყვიტეთ, კვლავაც ერთად მოგვეყარა თავი კვირის ყველაზე მნიშვნელოვანი ამბებისთვის.

1. 100-მდე ქართველმა მწერალმა, მთარგმნელმა და გამომცემელმა კულტურის სამინისტროს ბოიკოტი გამოუცხადა

მას შემდეგ, რაც მინისტრ თეა წულუკიანის გადაწყვეტილებით, 4 სექტემბრიდან მწერალთა სახლის დირექტორად ქეთევან დუმბაძე დაინიშნა, ქართველმა ლიტერატორებმა განცხადება გაავრცელეს. ისინი უარს ამბობენ ნებისმიერი ტიპის თანამშრომლობაზე კულტურის სამინისტროსთან და "მის პარტიულ დაქვემდებარებაში მოქცეულ მწერალთა სახლთან".

გაიგე მეტი.

2. გრეტა გერვიგის ბარბი წლის ყველაზე შემოსავლიანი ფილმი გახდა

ამერიკელი რეჟისორის ფილმი, რომელიც ზაფხულის მთავარი კინომოვლენა იყო, წლის კინომოვლენადაც იქცა. ბარბის შემოსავალმა $1,34 მილიარდს გადააჭარბა, რითაც მან სუპერ მარიოს შემოსავალს, $1,36 მილიარდს, გადაუსწრო და წლის ყველაზე შემოსავლიანი ფილმის სტატუსიც დაისაკუთრა.

გაიგე მეტი.

3. კაილი ჯენერი და ტიმოთი შალამე საჯაროდ პირველად გამოჩნდნენ ერთად

ვარსკვლავური წყვილის ურთიერთობაზე ხმები თვეების განმავლობაში ვრცელდებოდა, თუმცა, ყველაფერი სულ ახლახან დადასტურდა, როცა კაილი და ტიმოთი ერთად გამოჩნდნენ ბიონსეს კონცერტზე. ღონისძიებაზე გადაღებულმა ფოტოებმა კი, რა გასაკვირია, მალევე მოიცვა ინტერნეტსივრცე.

გაიგე მეტი.

4. როგორც იქნა, მიაძაკის უკანასკნელი ფილმის ტრეილერი გავრცელდა

ხანგრძლივი მოლოდინის შემდეგ, ლეგენდარული იაპონელი რეჟისორის, ჰაიაო მაიაძაკის, უკანასკნელი ფილმის როგორ ცხოვრობ? პირველი ტრეილერი გავრცელდა. ფილმი, რომელიც უკვე შეაფასეს "შედევრად", იაპონელმა კინომაყურებელმა ივლისში იხილა. თუმცა, პრემიერამდე მის შესახებ არაფერი იყო ცნობილი — არც შინაარსი გახმაურებულა და არც ტრეილერი გავრცელებულა.

გაიგე მეტი.

5. მექსიკის სასამართლოს გადაწყვეტილებით, აბორტი ლეგალური გახდა

მექსიკის სასამართლომ აბორტის დეკრიმინალიზაცია მოახდინა. სასამართლომ დაადგინა, რომ აბორტის აკრძალვა არაკონსტიტუციურია და ქალთა უფლებებს არღვევს. გასული წლების განმავლობაში ლათინურ ამერიკის ქვეყნების მოსახლეობა აქტიურად აპროტესტებდა აბორტის აკრძალვას და მათ შედეგსაც მიაღწიეს.

გაიგე მეტი.

6. შიმშილის თამაშების ახალი ფილმის პოსტერები გავრცელდა

როგორც ალბათ უკვე იცი, ნოემბერში ლეგენდარული დისტოპიური საგა ახალი ფილმით გვიბრუნდება. ბალადა მგალობელ ჩიტებსა და გველებზე სიუზენ კოლინზის ამავე სახელწოდების ბესტსელერს ეფუძნება და შიმშილის თამაშების ტრილოგიის ერთგვარ წინაისტორიას წარმოადგენს, სადაც ახალგაზრდა კორიოლანუს სნოუს შევხვდებით.

გაიგე მეტი.

7. ცნობილი ტელეწამყვანის ჯიმი ფელონის თანამშრომლები ტოქსიკურ სამუშაო გარემოზე ალაპარაკდნენ

ტელეკომპანია NBC-ის ღამის შოუს წამყვან ჯიმი ფელონს თანამშრომლები მტრული სამუშაო გარემოს შექმნაში ადანაშაულებენ. The Rolling Stone-ის გამოქვეყნებულ მასალებში 14 ყოფილი და 2 ახლანდელი თანამშრომელი ანონიმურად საუბრობს ფელონთან მუშაობის უარყოფით გამოცდილებაზე.

გაიგე მეტი.

8. The Rolling Stones-მა ახალი ორიგინალური ალბომი დააანონსა

ლეგენდარულმა ინგლისურმა როკჯგუფმა 2005 წლის შემდეგ პირველად მოუყარა თავი ახალ და ორიგინალურ კომპოზიციებს. Hackney Diamonds, ჯგუფისთვის რიგით 24-ე ბრიტანული და 26-ე ამერიკული სტუდიური ალბომი იქნება. გულშემატკივრები მის მოსმენას 20 ოქტომბრიდან შეძლებენ.

გაიგე მეტი.

9. The Boys-ის სპინოფ Gen V-ის ტრეილერი გავრცელდა

პოპულარულ სერიალ The Boys-ის სპინოფი Gen V კვლავაც სუპერგმირების სამყაროზე მოგვითხრობს, თუმცა ამჯერად საქმე კოლეჯის სტუდენტებს ეხებათ, რომლებიც სუპერგმირებისთვის შექმნილ გოდოლკინის უნივერსიტეტში სწავლობენ, ათას შარში ეხვევიან, კოლეჯის კედლებს სისხლით ავსებენ და თავიანთ ძალებს ბოროტადაც იყენებენ.

გაიგე მეტი.

10. ნეტფლიქსმა ქათმების გაქცევის ტრეილერი გაავრცელა

ცნობილი ანიმაციური ფილმი ქათმების გაქცევა გამოსვლიდან 23 წლის შემდეგ სპინოფით ბრუნდება. Chicken Run: Dawn of the Nugget-ს, სადაც მოქმედება პირველ ფილმში მომხდარი ამბებიდან 20 წლის შემდეგ ვითარდება, მაყურებელი 15 დეკემბრიდან იხილავს. 2000 წელს გამოსულმა ქათმების გაქცევამ $225 მილიონი დოლარი გამოიმუშავა.

გაიგე მეტი.