ომბუდსმენის წარმომადგენლებმა ყოფილი პრეზიდენტი კლინიკა ვივამედში მოინახულეს.

რატომ არის მნიშვნელოვანი: მიხეილ სააკაშვილის ოჯახის წევრებსა და ადვოკატებს განცხადებით, ექსპრეზიდენტის მდგომარეობა დღითი-დღე უარესდება.

  • ადვოკატები სასამართლოში სააკაშვილისთვის სასჯელის გადავადებას და მის საზღვარგარეთ სამკურნალოდ გადაყვანას ითხოვდნენ.
  • 6 თებერვალს სასამართლომ სასჯელი არ გადაუვადა, რაც თავად სააკაშვილმა "სასიკვდილო განაჩენად" შეაფასა.

დეტალები: სააკაშვილთან ვიზიტის შემდეგ, განცხადება გააკეთეს სახალხო დამცველის მოვალეობის შემსრულებელმა, გიორგი ბურჯანაძემ და ექსპრეზიდენტის ჯანმრთელობასთან დაკავშირებით ომბუდსმენის მიერ შექმნილი კონსილიუმის ერთ-ერთმა ექიმმა, თენგიზ წულაძემ.

  • წულაძემ აღნიშნა, რომ მდგომარეობა გაუარესებულია იმაზე მეტად, ვიდრე 4 დეკემბერს იყო — ბოლოს სწორედ 4 დეკემბერს მოინახულეს ომბუდსმენის წარმომადგენლებმა სააკაშვილი.
  • "გამოიხატება წონაში კლებით, გასინჯვის მონაცემებით ვამბობთ, რომ მდგომარეობა გაუარესებულია. ჯერჯერობით, ამის თქმა შემიძლია, დანარჩენს დეტალურად დავწერთ და გამოვაქვეყნებთ", — თქვა მან.

ბურჯანაძის განცხადებით, მომდევნო დღეებში ექიმებთან ერთად გამართავენ შეხვედრას და საბოლოო შეფასებასაც მათი მოსაზრებების გაანალიზების შემდეგ გააკეთებენ.

  • მისი თქმით, სააკაშვილის სამედიცინო დოკუმენტებს ვივამედიდან და პენიტენციურიდან გამოითხოვენ.