რუსეთის ფედერაციის საბჭოს საერთაშორისო საქმეთა კომიტეტის თავმჯდომარის პირველი მოადგილის კომენტარს ვესტნიკ კავკაზა ავრცელებს.

რატომ არის მნიშვნელოვანი: რუსეთთან უვიზო რეჟიმი 2008 წლის აგვისტოს ომის შემდეგ გაუქმდა, პირდაპირი ფრენები კი 2019 წლის 20 ივნისის შემდეგ აიკრძალა.

  • 2012 წელს საქართველომ რუსეთთან სავიზო რეჟიმი ცალმხრივად გაუუქმა, რაც იმას ნიშნავს, რომ რუსეთის მოქალაქეებს საქართველოში შემოსასვლელად ვიზა არ სჭირდებათ.
  • უკრაინის წინააღმდეგ ომის დაწყების შემდეგ საქართველოში რუსეთის მოქალაქეების რიცხვი გაიზარდა. ნაწილმა აქ უძრავი ქონებაც შეიძინა და ბიზნესებიც დაირეგისტრირა.
  • მაშინ, როცა მთელი მსოფლიოს ცივილიზებული ნაწილი რუსეთს სანქციებს უწესებს და იზოლაციაში აქცევს, საქართველოს ხელისუფლებაში პერიოდულად თანამშრომლობის განვითარებაზე საუბრობენ და ამბობენ, რომ ფრენების აღდგენა მისასალმებელი იქნება.

დეტალები: ვლადიმირ ჯაბაროვის მტკიცებით, რუსეთს საჰაერო კომუნიკაციების აღდგენის თხოვნით საქართველომ მიმართა.

  • მისივე თქმით, ეს რამდენიმე კვირის წინ მოხდა.
  • "მან, ასევე, აღნიშნა, რომ რუსებიც და საქართველოს მცხოვრებლებიც მოხარულები იქნებიან ასეთი შესაძლებლობის დაბრუნებით: მათი ნაწილისთვის გამარტივდება ტურისტული მოგზაურობები, ხოლო მეორენი უფრო ადვილად ნახავენ ახლობლებს", — წერს გამოცემა.
  • აქვე, ჯაბაროვი ამბობს, რომ ევროკავშირი პირდაპირი ფრენების წინააღმდეგია და საქართველოს საქმეებში "თავხედურად ერევა".
  • On.ge ინფორმაციის გადასამოწმებლად ეკონომიკის სამინისტროს დაუკავშირდა და პასუხს ელოდება.