რუსეთის საგარეო საქმეთა მინისტრის შეფასებით, ზელენსკის გამოსვლა, "რომელიც დასავლეთის რჩევებს მოლაპარაკებების შესახებ არ უსმენს", "საომარი, აგრესიული და რუსოფობიური" იყო.

რატომ არის მნიშვნელოვანი: ვოლოდიმირ ზელენსკიმ, დიდი ოცეულის სამიტზე ვიდეო მიმართვაში განაცხადა, რომ უკრაინა მხოლოდ სუვერენიტეტის შენარჩუნების პირობებში დათანხმდება რუსეთთან მოლაპარაკებებს.

  • დიდი ოცეულის მე-17 შეხვედრა, რომელიც ბალიში, ინდონეზიაში იმართება, არის მსოფლიო ლიდერების ყველაზე მასშტაბური შეკრება კორონა ვირუსის პანდემიის დაწყების შემდეგ.
  • სამიტის დამსწრე ქვეყანათა უმრავლესობა, შეთანხმდა დოკუმენტის დრაფტის მიღებაზე, სადაც დაგმობენ რუსეთის სრულმასშტაბიან შეჭრას უკრაინაში.

დეტალები: ლავროვი უკმაყოფილებას გამოთქვამს იმის გამო, რომ ზელენსკის ჩანაწერი 20 წუთის განმავლობაში ისმოდა სამიტზე, ხოლო სხვა მონაწილეებს არა უმეტეს სამი წუთი მიეცა სალაპარაკოდ. საგარეო საქმეთა მინისტრის განცხადებებს პროპაგანდისტული მედია Tass ავრცელებს.

  • "მისი შეჩერება შეუძლებელი იყო და ალბათ არც სურდათ ჩანაწერის გათიშვა", — აღნიშნა განაწყენებულმა ლავროვმა.
  • ამასთან, რუსეთის წარმომადგენელმა კიდევ ერთხელ განაცხადა, რომ "ევროკავშირი და ნატო დიდი ხანია ჰიბრიდული მონაწილეები არიან უკრაინის ჰიბრიდულ ომში".
  • მან ასევე განაცხადა, რომ რუსეთმა "არაერთხელ დაადასტურა პრეზიდენტის პირით, რომ ის არ ამბობს უარს მოლაპარაკებებზე", — უკრაინა კი უარს აცხადებს რუს დიქტატორთან მოლაპარაკებაზე.

გარდა ამისა, ლავროვის თქმით, მაკრონთან დიდი ოცეულის ფარგლებში მოკლე შეხვედრის დროს, საფრანგეთის პრეზიდენტმა "დაადასტურა თავისი მზაობა, გააგრძელოს პუტინთან კონტაქტი, რათა მოიძებნოს გარკვეული შეთანხმებები, რომლებიც სიტუაციას მოაგვარებს".

  • ლავროვი ტრადიციულად იმუქრება, რომ "რაც უფრო დიდხანს იტყვის [უკრაინა] უარს, მით უფრო რთული იქნება შეთანხმების მიღწევა".
  • უკრაინის პრეზიდენტის მრჩეველმა ლავროვს უპასუხა: "რუსეთი არის ის, ვინც შემოიჭრა უკრაინაში. რუსეთი ბომბავს ჩვენს ქალაქებს. რუსეთი ჩადის გენოციდს, ანადგურებს ენერგეტიკულ ინფრასტრუქტურას. მაგრამ "უკრაინა აჭიანურებს კონფლიქტს"? ომი კვლავ გრძელდება მხოლოდ ლავროვის საჯარო მანიპულაციისა და მზაობის არ ქონის გამო, შეწყდეს მკვლელობები.

სტრიქონებს შორის: უკრაინის პრეზიდენტის განცხადებით, ხერსონის დაბრუნება რუსეთ-უკრაინის ომში გარდამტეხი მნიშვნელობის იქნება.

  • ხერსონიდან გასვლის შემდეგ, რუსეთმა მოლაპარაკებების საჭიროებაზე და მზაობაზე დაიწყო საუბარი.
  • უკრაინის პრეზიდენტის მრჩეველი, მიხაილო პოდოლიაკი თვლის, რომ დონეცკის ან ლუგანსკის განთავისუფლების შემდეგ რუსეთი მოლაპარაკებებს დაიწყებს ან უკრაინიდან ჯარებს გაიყვანს.