ამის შესახებ ნაციონალური მოძრაობის წევრი სოციალურ ქსელში წერს.

რატომ არის მნიშვნელოვანი: 9 ნოემბერს ენმ-ის წევრთა ნაწილმა ყველა დონეზე შიდაპარტიული არჩევნები მოითხოვა. მათი თქმით, თავიდან უნდა აირჩიონ პოლიტიკური სამდივნო, პოლიტიკური საბჭო და საჭიროა თავმჯდომარის არჩევნებიც.

  • ენმ-ის თავმჯდომარის, ნიკა მელიას შეფასებით, კოლეგებს ახალი არაფერი უთქვამთ და ამ საკითხებზე შიდაპარტიული, აქტიური, ყოველდღიური მსჯელობა მიმდინარეობდა კონსოლიდირებული პოზიციის ჩამოსაყალიბებლად.
  • აცხადებს იმასაც, რომ უახლოესი პერიოდი აუცილებლად გამოაჩენს რა იყო ამ საკითხის "ამ ფორმით, ასე ნაჩქარევად" გამოტანის რეალური მიზეზი და მიზანი, მაშინ, როცა ევროპარლამენტის განცხადებებზე უნდა ესაუბრათ.

ჩალაძე წერს, რომ დრო არ ითმენს და ეფექტური მოქმედებაა საჭირო, რომლის შედეგიც ექსპრეზიდენტის, მიხეილ სააკაშვილის გათავისუფლება იქნება.

  • "ფაქტია დღემდე ეს ვერ მოხერხდა. ისიც ფაქტია, რომ შესაძლებლის კეთება არ არის საკმარისი".
  • მისივე თქმით, წარსულზე დროის დაკარგვას არ აპირებს, რადგან ვერ შეცვლის, თუმცა ამბობს: "ჩვენ შეგვიძლია მომავალი შევქმნათ ერთად".

დეტალები: ჩალაძის განცხადებით, პარტია ამ ბრძოლაში შეუცვლელი ინსტრუმენტია, მზადაა, აიღოს პასუხისმგებლობა და ამომრჩეველთან ერთად ბრძოლა ბოლომდე, "მიშას გათავისუფლებამდე" მიიყვანოს.

  • "მე მჭირდება ყველა თქვენგანის დახმარება ამ საერთო მიზნის მისაღწევად. ხალხის ძალა, იდეის ერთგულება და სიმამაცე, ეს ყველაფერი ერთად არის გამარჯვების ფორმულა. ამიტომ, მე დავაყენებ ჩემს კანდიდატურას არჩევნებში".
  • "მჯერა, ამას უზრუნველყოფს პარტიის პოლიტსაბჭო. დრო არ ითმენს. საჭიროა კოორდინირებული მოქმედება დაუყოვნებლივ როგორც საქართველოში, ასევე ქვეყნის გარეთ".
  • "ჩემთვის ეს არის პროექტი — თავისუფლება მიშას! მჯერა ამ საქმეში ჩვენ ერთად გავიმარჯვებთ".

მანამდე, ლევან ხაბეიშვილმა, ხატია დეკანოიძემ და პეტრე ცისკარიშვილმა განაცხადეს, რომ არჩევნებში მონაწილეობას არ აპირებენ.