ომის კვლევის ინსტიტუტის (ISW) თანახმად, უკრაინის არმიამ სამხრეთ-აღმოსავლეთში ხარკოვის ოლქის მიმართულებით ეფექტიანი კონტრშეტევისთვის, რუსეთის ჯარების დისლოკაციით და მათი სამხრეთში გადაყვანით ისარგებლა.

რატომ არის მნიშვნელოვანი: 29 აგვისტოს სამხრეთის მიმართულებით უკრაინა შეტევაზე გადავიდა. ამ დრომდე, უკრაინა ძირითადად სამხრეთით, ხერსონის ოლქის მიმართულებით უტევდა ოკუპანტებს, სადაც გარკვეული წინსვლაც აქვთ.

  • უკრაინის თავდაცვის სამინისტროს ინფორმაციით, ფრონტის ხაზი ამჟამად 2,5 ათას კმ-ზეა გადაჭიმული, აქედან 1,3 ათას კილომეტრზე აქტიური საომარი მოქმედებები მიმდინარეობს.

დეტალები: როგორც ISW-ს ანგარიშშია ნათქვამი, უკრაინელმა სამხედროებმა, ხარკოვის მიმართულებით კონტრშეტევისთვის ტაქტიკური მოულოდნელობა გამოიყენეს.

  • ISW აღნიშნავს, რომ უკრაინის არმიამ ხარკოვის ოლქის ქალაქ ბალაკლეის რაიონში წინ დაახლოებით 20 კილომეტრით წაიწიეს.
  • ცენტრის ექსპერტები ვარაუდობენ, რომ უკრაინელმა სამხედროებმა დაიბრუნეს დაახლოებით 400 კმ² ტერიტორია.

ვოლოდიმირ ზელენსკიმ ხარკოვის ოლქში უკრაინის შეიარაღებული ძალების იერიშზე 7 სექტემბერს ვიდეომიმართვისას ისაუბრა.

  • უკრაინის პრეზიდენტის თქმით, ჯერ არ არის იმ დასახლებული პუნქტების დასახელებისთვის დრო, სადაც უკრაინის დროშა ბრუნდება.

ამასთან ხარკოვის ოლქის ე.წ. ადმინისტრაცია ადასტურებენ უკრაინის არმიის თავდასხმებს. ინფორმაციას კრემლისტური მედია ტასს ავრცელებს.

  • ე.წ. სამხედრო-საოლქო ადმინისტრაციის ხელმძღვანელი ამბობს, რომ უკრაინელი სამხედროების სარაკეტო დარტყმების გამო, იძულებული არიან ქალების და ბავშვების ევაკუაცია განახორციელონ იზიუმის და კუპიანსკის რაიონებიდან.

გარდა ამისა, უკრაინა სამხრეთის, ხერსონის ოლქის მიმართულებითაც განაგრძობს კონტრშეტევას.

  • ISW უკრაინულ და რუსულ წყაროებზე დაყრდნობით აღნიშნავს, რომ 7 სექტემბერს ხერსონის რეგიონში ორი ძირითადი მიმართულებითა იყო აქტივობა — ხერსონის რეგიონის ჩრდილოეთით დნეპროპეტროვსკის ოლქის საზღვრის სამხრეთით და ხერსონის ოლქის დასავლეთით საზღვრის გასწვრივ.
  • ბრიტანეთის დაზვერვის განცხადებით, უკრაინის არმიამ, სავარაუდოდ, გაანადგურა დარივკასთან მდებარე პონტონის სამხედრო ხიდი, რომელიც რუსებმა უახლოესი ხიდის დაზიანების შემდეგ მოაწყვეს.
  • უწყება აღნიშნავს, რომ დარივკას გადასასვლელი დნეპრის გასწვრივ რუსეთის არმიის ჩრდილოეთ და სამხრეთ სექტორების დამაკავშირებელი ერთ-ერთი მთავარი გზაა.