ინიციატივა საგარეო საქმეთა მინისტრების 31 აგვისტოს შეთანხმებას მოჰყვა. ევროკომისიის განცხადებით, ქვეყანა, რომელიც უკრაინაში აგრესიულ ომს აწარმოებს, გამარტივებული ვიზის პირობებით არ უნდა სარგებლობდეს.

რატომ არის მნიშვნელოვანი: დიდი ხანია დაიწყო მსჯელობა, უნდა შეაჩეროს თუ არა EU-მ არსებული შეთანხმება.

• ინიციატივის დამტკიცების შემთხვევაში, რუსეთის მოქალაქეები ვეღარ ისარგებლებენ პრივილეგიებით და და ევროკავშირში შესასვლელად უფრო ხანგრძლივი, ძვირი და რთული პროცესის გავლა მოუწევთ.

დეტალები: გამარტივებული ვიზის შეთანხმების გაუქმებით რუსეთის მოქალაქეები შენგენის ზონაში მოკლევადიან ტურისტულ ვიზებზე განცხადების გაკეთებას ვეღარ შეძლებენ. ამის ნაცვლად, გამოყენებული იქნება სავიზო კოდექსის ზოგადი წესები, რაც გულისხმობს:

• ყველა აპლიკანტისთვის ვიზის საფასურის გაზრდას 35-დან 80 ევრომდე;
• საკონსულოებისთვის გადაწყვეტილების მიღების ვადის გაზრდას 10-დან 15 დღემდე, ხოლო თუ კი განცხადების შემდგომი შესწავლაც გახდება საჭირო, ვადა 45 დღემდე გაიზრდება;
• აპლიკანტებს აღარ ექნებათ მარტივი წვდომა იმ ვიზაზე, რომელიც მათ შენგენის ზონაში რამდენჯერმე შესვლის უფლებას აძლევს;
• აპლიკანტებს განაცხადის შეტანისას სხვადასხვა სახის დოკუმენტაციის წარდგენა მოუწევთ და ვეღარ ისარგებლებენ გამარტივებული ვიზის შეთანხმებით გათვალისწინებული შემცირებული დოკუმენტების პრივილეგიით.

ინიციატივის მიხედვით, შეზღუდვა არ გავრცელდება იმ განმცხადებლებზე, რომლებიც გადაუდებელი მიზეზით მიემგზავრებიან — მათ შორის, ევროკავშირის მოქალაქეების ოჯახის წევრებზე, ჟურნალისტებზე, პოლიტიკური დევნილებისა და სამოქალაქო საზოგადოების წარმომადგენლებზე.

• ასევე, წინადადების თანახმად, ევროკავშირის წევრმა სახელმწიფოებმა არ უნდა აღიარონ უკრაინის ოკუპირებულ ტერიტორიებში გაცემული რუსული პასპორტები

შემდეგი ნაბიჯი: ახლა ჯერი ევროსაბჭოზეა. თუ ინიციატივა დამტკიცდება, ის ძალაში გადაწყვეტილების მიღების შემდეგ დღეს შევა, რუსეთი კი შეთანხმების გაუქმებაზე ინფორმაციას მის ძალაში შესვლამდე არაუგვიანეს 48 საათში გაიგებს.

• რაც შეეხება უკრაინის ოკუპირებულ რეგიონებში გაცემული რუსული პასპორტების არაღიარებას, ინიციატივის დამტკიცების შემთხვევაში გადაწყვეტილება რუსეთს პირველივე დღეს ეცნობება.

კონტექსტი: ევროკავშირსა და რუსეთს შორის გამარტივებული ვიზის შეთანხმება ძალაში 2007 წელს შევიდა.

• ევროკავშირმა გამარტივებული ვიზის შეთანხმება რუსეთის ოფიციალური პირებისა და ბიზნესმენებისთვის ამ წლის 25 თებერვალს შეწყვიტა.
• ევროკომისიის წინადადების დამტკიცების შემთხვევაში სრულად გაუქმდება შეთანხმებას რუსეთის ყველა მოქალაქისთვის.
• აგვისტოს ბოლოს ევროკავშირის მინისტრებმა ორდღიანი შეხვედრების შემდეგ, მიაღწიეს კონსენსუსს, რომ სრულად შეაჩერონ რუსეთთან სავიზო რეჟიმის გამარტივების შესახებ შეთანხმება.