მსოფლიოში ცნობილი მოდის ჟურნალი Vogue ქართული ჩოხის შესახებ წერს. როგორც სტატიაშია აღნიშნული, Vogue-ის ყურადღება ქართულმა ჩოხამ მერსედეს-ბენცის თბილისის მოდის კვირეულზე მიიპყრო.

სტატიის შესავალში მკითხველისთვის განმარტებულია ჩოხის მნიშვნელობა.

„ჩოხა მატყლისგან დამზადებული ტანისამოსია, რომელსაც ძირითადად მამაკაცები ატარებენ. მას მკერდზე ვაზნების შესანახი ჯიბე აქვს. ადრე, ის უბრალოდ ნაკეცები იყო, მაგრამ მოგვიანებით ტყვიებისა და დენთის სათავსოდ გადაკეთდა. ახლა ის უბრალოდ დეკორაციული ფუნქცია აქვს" - წერს Vogue.

სტატიის ავტორი ჩოხის ისტორიულ განვითარებაზეც წერს. ავტორი აღნიშნავს, რომ ჩოხა, როგორც ასეთი, სპარსეთიდან წარმოიშვა და საქართველოში მეცხრე საუკუნეში დამკვიდრდა. ტანისამოსის ისტორიაზე საუბრისას, ჟურნალისტი ამბობს, რომ ჩოხა საბჭოთა კავშირის დროს თითქმის არ გამოიყენებოდა, მაგრამ დამოუკიდებლობის აღდგენის შემდეგ, ქართველებმა ჩოხის ტრადიცია ეროვნული სიამაყის მოტივით აღადგინეს.

ბოლო დროს ქართული ჩოხა ძალიან მოდური გახდა და მას სხვადასხვა დიზაინერები ინსპირაციის წყაროდაც იყენებენ. სწორედ ამის შესახებ წერს ჟურნალიც. სტატიაში ნათქვამია, რომ ჩოხის ტრენდი წარმოშობით ქართველი დიზაინერის სახელს, დავიდ კომას უკავშირდება. მან ლონდონის შემოდგომის მოდის კვირეულისთვის თავის კოლექციაში მშობლიური ტრადიციული შტრიხები შეიტანა და ჩოხის მოტივზე მოსასხამების თანამედროვე დიზაინი შექმნა.

დავიდ კომას დიზაინით შექმნილი მოსასხამი

დავიდ კომას დიზაინით შექმნილი მოსასხამი

ფოტო: Indigital.tv

ჟურნალისტი წერს, რომ დავიდ კომამდე სხვა ქართველ დიზაინერებსაც გამოუყენებიათ ჩოხა ინსპირაციის წყაროდ. მაგ: დათუნა სულიკაშვილსა და სიმონ მაჩაბელს. სტატიაში მოყვანილია სიმონ მაჩაბლის კომენტარიც, რომელიც ამბობს, რომ ჩოხა ოდითგანვე ხალხური სამოსი იყო და მისი თანამედროვე ინტერპრეტაციები საინტერესო უნდა იყოს.

თბილისის შემოდგომის კოლექციის ჩვენების პირველ დღეს ჩოხის თანამედროვე ვერსიები ანუკი ქებურიამ და ლიკა გოგლიძემ წარმოადგინეს.

ანუკი ქებურიასა (მარცხნივ) და ლიკა გოგლიძის დიზაინი

ანუკი ქებურიასა (მარცხნივ) და ლიკა გოგლიძის დიზაინი

ფოტო: Courtesy of Mercedes-Benz Fashion Week Tbilisi

სტატიის დასასრულისკენ ჟურნალისტი ერთ ძალიან საინტერესო ამბავს იხსენებს. ის წერს, რომ 1989 წელს საქართველოს დიზაინერი რეი კავაკუბო ეწვია, რომელიც ნიკო ფიროსმანის დიდი გულშემატკივარი ყოფილა. ის საქართველოში ბრიტანელ ფოტოგრაფ ბრაიან გრიფინთან ერთად ჩამოვიდა, რათა იმ დროინდელი სოფლის მოსახლეობა თავისი ბრენდის (Comme des Garçons) სამოსელში გადაეღო. საბოლოოდ, ფოტოგრაფმა ქართველები Comme des Garçons-ისა და ჩოხის მიქსში გადაიღო. ეს ფოტოები გასულ წელს თბილისში ArtBeat-ის ფარგლებში გამოიფინა.

ფოტო: Courtesy of Brian Griffin / ProjectArtBeat

სტატიის ბოლოს ჟურნალისტი მკითხველს უმხელს თუ სად და როგორ შეიძლება თანამედროვე ჩოხის შეძენა.