ტრამპის ადმინისტრაცია ევროპის აეროპორტებიდან აშშ-ის მიმართულებით მიმავალი თვითმფრინავების ბორტზე ლეპტოპების ატანის აკრძლავის საკითხს განიხილავს. ამის შესახებ ბრიტანული გამოცემა The Guardian საკუთარ წყაროზე დაყრდნობით წერს.

აკრძალვა ეხება თვითმფრინავში სმარტფონზე დიდი ელექტრონული მოწყობილობის შეტანას იმ არგუმენტით, რომ ტერორისტები აღნიშნულ მოწყობილობებს ასაფეთქებელი ნივთიერებების გადასატანად იყენებენ.

ინიციატივა იქნება იმ გადაწყვეტილების იდენტური, რომლის მიხედვითაც, რამდენიმე მუსლიმური სახელმწიფოს ავიაკომპანიის აშშ-სკენ მიმავალ თვითმფრინავებში აიკრძალა მსგავსი მოწყობილობების ატანა.

The Guardian წერს, რომ ჯერჯერობით გაურკვეველია, თუ რატომ სურს აშშ-ს ხელისუფლებას სმარტფონზე დიდი ელექტრონული მოწყობილობების აკრძალვა ევროპის აეროპორტებიდანაც.

აშშ-ის შიდა უსაფრთხოების დეპარტამენტის პრესსპიკერი, გილიან კრისტენსენი ამბობს, რომ ისინი განაგრძობენ ამ მიმართულებით საფრთხეების შეფასებას და ამაზე დაყრდნობით მიიღებენ გადაწყვეტილებას.

ახლო აღმოსავლეთის ქვეყნებიდან მიმავალი თვითმფრინავებისთვის აკრძალვის დაწესების შესახებ, მარტში ბრიტანეთმაც განაცხადა.