ბიძინა ივანიშვილი ცოტა ხნის წინ გამოქვეყნებულ ღია წერილში ღვინის კულტურასა და იმ გავლენაზე საუბრობს, რომელიც მას საქართველოსა და ქართვე ერზე აქვს:

"როდესაც ქართულ ფენომენზე ვლაპარაკობთ, აუცილებლად უნდა შევეხოთ ვაზის კულტურას, რაც ასევე ჩვენი ცხოვრების წესის და ჩვენი მსოფლმხედველობის ერთ-ერთი უმთავრესი ნიშანთაგანია. შემთხვევით არ არის, რომ საქართველოში სწორედ ვაზის ჯვრით შემოვიდა ქრისტიანობა, რაც ჩვენი იდენტობის უმნიშვნელოვანესი განმსაზღვრელია".

ივანიშვილი წერილში წერს, რომ ხის ნავმა მხოლოდ ქართველები მიაჯაჭვა სამშობლოს, რადგან მისთვის უფრო მთავარი სტუმრის მიღება იყო:

"ნახევრად ხუმრობით ვიტყვი, თუმცა, შეიძლება, ეს არც ისე შორს იყოს სიმართლისგან - სადაც კი ადამიანმა ნავი გათალა, მაშინვე სხვა ქვეყნებს მიაშურა. ნავმა მხოლოდ ქართველი მიაჯაჭვა საკუთარ მიწა-წყალს, რადგან ჩვენი წინაპრისთვის ნავი საწნახელი იყო, რაშიც ღვინოს წურავდა და სხვაგან წასვლას, შინ სტუმრის ლოდინს ამჯობინებდა.

ნავმა მხოლოდ ქართველი მიაჯაჭვა საკუთარ მიწა-წყალს, რადგან ჩვენი წინაპრისთვის ნავი საწნახელი იყო, რაშიც ღვინოს წურავდა და სხვაგან წასვლას, შინ სტუმრის ლოდინს ამჯობინებდა

ჩვენ მსოფლიო გვიცნობს როგორც ოქროს საწმისის მხარეს და როგორც ღვინის სამშობლოს; ღვინო ქართული სიტყვაა, რომელიც მსოფლიოში გავრცელდა. ქართული ხასიათი და ქართველი ადამიანის ცხოვრებისადმი დამოკიდებულება ღვინის კულტურამ ჩამოაყალიბა".

ივანიშვილი ამბობს, რომ ვაზს უკავშირდება ქართველების ხასიათი, რომელიც სხვა ადამიანებისთვის ბედნიერების მინიჭებაში გამოიხატება:

"ვაზს უკავშირდება ქართული სუფრის უნიკალური ფენომენი, რომელიც ზუსტად გამოხატავს ქართველი კაცის დამოკიდებულებას ცხოვრების რაობის მიმართ, სადაც სიცოცხლის აზრად დასახულია თვით სიცოცხლისვე სიყვარული და მისი ყველაზე დიდი გამოვლინება - სხვა ადამიანისთვის ბედნიერების მინიჭების სურვილი, მრავალხმიანი სიმღერა, ცეკვა, ლექსი, რაც საკუთარ თავს გვამსგავსებს, რაშიც ყველაზე მეტად ვლინდება ჩვენი მეობა და კულტურის თვითმყოფადობა და რაც უდავოდ კაცობრიობის შენაძენია".

ქართული ოცნების რიგით მეოთხე ყრილობაზე დაანონსებული ღია წერილი ბიძინა ივანიშვილმა ცოტა ხნის წინ გამოაქვეყნა, რომელშიც ყოფილი პრემიერი საქართველოში დღეს არსებულ მდგომარეობაზე მისეულ ხედვებსა და სამომავლო გეგმებზე საუბრობს.

ბიძინა ივანიშვილის ღია წერილი