ბიძინა ივანიშვილი ცოტა ხნის წინ გამოქვეყნებულ ღია წერილში ქართველი ერის ტოლერანტობაზე საუბრობს.

ყოფილი პრემიერი იხსენებს თბილისში გვერდიგვერდ მდგარ ტაძრებს, რომლებიც 4 განსხვავებული სარწმუნოების მიმდევრებს აერთიანებს, საუბრობს სკოლებში ქრისტიანი და მუსლიმი ბავშვების ჰარმონიულ თანაცხოვრებაზე და ქართველების და ებრაელების ოცდაექვსსაუკუნოვანი ძმობაზე:

"ჩვენი ხასიათისთვის სრულიად უცხოა და მიუღებელი სხვისი სიწმინდეების შეურაცხყოფა, რელიგიური შეუწყნარებლობა და ადამიანის ეთნიკური ნიშნით დამცირება. ამ მხრივ საქართველო არის სხვადასხვა ეთნოსის თუ რელიგიური ჯგუფის მეგობრულად და კეთილგანწყობით თანაარსებობის მისაბაძი მოდელი".

ივანიშვილის თქმით, არსებობს მცდელობები, ქართველებს თავზე მოახვიოს პოლიტიკური თუ რელიგიური რადიკალიზმი, აგრესია განსხვავებული აზრისა თუ ცხოვრების წესის გამო, რაც ქართველების არსებობის საფუძველებს განადგურებით ემუქრება:

"ამიტომ ნებისმიერი ასეთი გამოვლინების მიმართ განსაკუთრებული სიფხიზლე და შეურიგებლობა გვმართებს".

ყოფილი პრემიერის თქმით, ტოლერანტობა წარმოადგენს დღევანდელ მსოფლიოში არსებული ბევრი მწვავე პრობლემის გასაღებს:

"ამ ოთხი წლის განმავლობაში გავაღრმავეთ ურთიერთობა მეგობრებთან და სტრატეგიულ პარტნიორებთან. ამ დაბალანსებული და მშვიდი პოლიტიკის შედეგია, რომ მიუხედავად რეგიონში არსებული მწვავე კრიზისისა, საქართველოში იზრდება ტურიზმიც და მთლიანად ეკონომიკაც".

ქართული ოცნების რიგით მეოთხე ყრილობაზე დაანონსებული ღია წერილი ბიძინა ივანიშვილმა ცოტა ხნის წინ გამოაქვეყნა, რომელშიც ყოფილი პრემიერი საქართველოში დღეს არსებულ მდგომარეობაზე მისეულ ხედვებსა და სამომავლო გეგმებზე საუბრობს.

ბიძინა ივანიშვილის ღია წერილი